曼聯領隊費爵爺雖然名成利就，打跛腳唔憂，但日前提過，佢老人家最近為咗佢隻馬「直布羅陀山」嘅擁有權同天文數字嘅配種權，不惜可能要同紅魔嘅大股東嘅麥尼亞及麥文紐斯對簿公堂。
據講隻馬嘅配種權高達四千至八千萬英鎊（約五億二千七百萬至十億五千萬港元），唔怪得老費要告大股東，話自己要有隻馬嘅一半擁有權。
計我求大俠話，老費咁做真係要冒好大嘅險，一個唔覺意，隨時搞到自己乜都冇晒。事關佢同曼聯嘅合約會喺○五年夏天屆滿，而曼聯方面亦準備咗份總值千二百萬鎊嘅四年合約畀佢，但佢玩到咁大，身為曼聯大股東嘅麥尼亞即刻hold住份約。如果佢真係為隻馬而唔可以留低，無論對佢自己抑或曼聯，都係非常大嘅損失。
睇見南美洲嘅高原國家玻利維亞世界盃外圍賽成績，真係令我求大俠有啲懷疑高原訓練嘅效用。呢隊綠衣軍團踢咗四場外圍賽，淨係喺主場數過哥倫比亞四粒，連同周二又輸畀弱旅委內瑞拉，合共三場作客落敗共失十球，長捧上盤對家真係笑到碌地，甚至忍唔住會話：玻利維亞你得嘅！
紐卡素前鋒阿美奧比早前希望代表尼日利亞國家隊出賽，英足總最終否決佢提案，話佢以前多次代表英格蘭二十一歲以下國家隊出賽，所以作出否決。阿美奧比係因為早前友賽丹麥時，無被艾歷臣睇中，所以先至話要代表尼國，佢先得二十二歲，重有好多機會，唔使咁意氣用事。
中國國家隊最新名單日內公布，由於二十個準備踢東亞盃嘅球員，會牽連到明年中超聯限制每隊擁有國腳人數，傳聞好多甲A球會都唔想隊中太多球員入選，導致明年聯賽前，唔可以引進更多國腳級球員加入。如果中國唔派實力較佳球員應付東亞盃，怕且想奪冠都幾難。
魔術教頭李華士啱啱被炒魷，其實魔術沉淪都唔可以怪晒佢，致命傷喺年薪成千萬美元嘅格蘭希爾喺過去三個半球季，只打得四十幾場波，唔單止累麥基迪每季都要做單天保至尊，重綁死晒魔術嘅薪金上限難以招精兵。魔術每年都大換血，每季都要由零開始，要教得好都幾難！