香港人之所以人工貴過國內同胞，識英文係其中一個重要因素，但睇怕呢個強項都唔維持得幾耐，皆因遼寧省省長噚日下戰書，希望後年遼寧省代表團再來香港時，可以搞一場英語演講比賽，等兩地學生切磋切磋。
八方日前講過四川省來港招商，噚日輪到遼寧省招商，更由靚仔省長薄熙來帶隊。佢喺開幕禮上足足講咗一粒鐘，表明上任省長近三年以來，無論喺對外招商、環保、處理下崗工人、城市現代化上均較之前有明顯進步，其中一項政改係要全省二百萬小學生學英語同電腦，所以先有上述嘅戰書。佢更相信，呢班兒童到十七、八歲後，英語水平甚至唔會輸畀歐美國家嘅青年。
薄省長又話，香港對皇馬嗰場波，幫香港入球嘅就係來自遼寧省嘅球員，佢重誇下海口，話○八年北京奧運會，遼寧省攞嘅金牌可以同日本比高下。
傳真︰2623-9278
電郵︰