自由行帶畀香港唔少商機，受惠嘅旅行社東主兼商舖投資者羅太，原本只租用尖沙嘴中部寫字樓，近嚟見嗰區商廈造價持續向上，決定自置物業，結果喺兩個月內掃入5件貨，其中一伙更已極速轉手，獲利逾32萬元。
中原陳玉雲透露，羅太一直活躍舖位市場，眼見尖沙嘴商廈造價有升冇跌，就喺9月份斥資646萬，買入區內力寶太陽廣場高層2300方呎單位；後來又加碼，購入物業同層另一個1100方呎嘅單位，諗住自用作寫字樓。
除自用單位外，羅太重購入多個區內商廈作投資用途，其中好時中心6樓一個逾1000方呎單位，以225萬賣出，買入價只係193萬，兩個月賺32萬。至於以近768萬購置嘅康宏廣場，中層2300方呎單位，現時每個月收約3.8萬租金，回報率差不多6厘。
深圳地鐵工程進行得如火如荼，𠵱家出咗羅湖關口，走上羅湖城天橋，羅湖站個地盤就在眼前，規模大到可用一望無際嚟形容。地盤邊界已經擴展去到香格里拉酒店前面，連羅湖城旁邊個中巴站都要讓位，成個移後幾百呎。
聽內地人士講，深圳地鐵最快明年中以後試車，有初步消息話喺8月份，如果試車理想，最快年底可以通車。到時香港人北上就更加方便，一出關口就可以搭地鐵，唔使再為「打的」講價而煩惱。
內地唔少物業項目，都會搵項目策劃幫手發展，即係發展商只負責出錢起樓，其他細節交由項目策劃公司負責，範疇視乎唔同發展商而定。
由香港啟勝管理負責項目策劃同物業管理嘅東莞常平星匯中心，發展商係星匯實業同東莞市常平房地產開發實業，賣樓推廣亦係由啟勝負責，物業包括咗18層服務式住宅，面積700到接近1200方呎，一般售價約22萬人民幣；而面積1400至9400方呎嘅寫字樓，樓高21層；另外重有3層商場商舖都會招租。
唔知係咪市道好轉，地產界又出現人事變動，大約半年前加入嘉華地產嘅助理總經理方俊，聽講已經向公司請辭，唔知係咪又有新去向。
噚日向方俊打聽，佢話啱啱日前離開嘉華，噚日先正式放假，暫時會先休息一段時間充吓電，而呢段時間最緊要嘅就係陪吓個女，因為平時返工都冇乜時間增進父女感情。
至於佢嘅新去向，就會喺適當嘅時候公布，叫大家唔使心急。雖然佢喺嘉華嘅時間唔算好耐，但講起代表作，不期然會諗起荃灣半山嘅朗逸峰，事關個盤可謂今年新盤中最快賣完嘅一個。
長實東涌映灣園呢期鍾意用玩具做宣傳，希望吸引多啲年輕買家注意。繼上回嘅潮流玩具展後，周末又搞「懷舊珍藏玩具」展覽，展出唔同嘅Barbie系列公仔，同場重會加映其他私人珍藏嘅玩具。
所有展品都有翻咁上下歷史，市面都未必搵得到，小朋友可能未必識欣賞，但係就啱晒一班大細路嘅口味──搵番以往嘅童真。
一眾Barbie同玩具迷唔使擔心淨係得個睇字，嚟緊一連兩個周末，售樓處都會舉辦抽獎，預備咗20個「情人Barbie」公仔，送畀幸運嘅參觀人士；另外重有大獎，分別係3呎高嘅胡桃夾子Barbie，同埋2呎高嘅鹹蛋超人公仔，總之男女通殺。
重有1個月就到聖誕，各區商場布置亦開始換新裝，信和旗下嘅商場，今年就以彩虹7色為主題，焦點自然喺就嚟翻新完嘅尖沙嘴中港城，用齊7種色彩嘅小精靈同聖誕老人布置，代表7種唔同個性。
至於其他商場，就會用唔同嘅顏色做主題，好似屯門市廣場就用紫色，場內會見到唔少紫色小精靈布置。信和話今年嘅聖誕裝飾，總開支約莫500萬；當中又以中港城同埋屯門市廣場最重手，分別用咗100萬。
蘭西
電郵地址：
