雖然中央不斷挺港，但外圍不利消息亦接踵而至，先有拉登恐嚇日本，再有美國對華紡織品實施新配額限制，令市場憂慮中美貿易摩擦惡化，會爆發貿易戰，港股噚日再挫154點，收11872，成交132億元。
今次配額限制範圍只包括針織、胸圍及晨衣，其實明眼人都睇出對中國影響不大，但美國就可向商界作出交代，為總統大選鋪路，如此小意思又點會引發中美爆發貿易戰呢？反而FBI對金融市場欺詐行為進行調查，所帶來的殺傷力可能更為驚人。
彩星（635）復牌後，股價跌至配股價1.60元收市，挫7.5%。今次由里昂包銷１億股，另可要求加碼發行多3000萬股，阿虎見到已有1.3億股上咗板，即意味有人可能已沽空3000萬股，亦等於有3000萬股購買力，可隨時入市支持彩星股價，短期內彩星應可守住1.60元水平，但遲啲就要睇番個市點走。
反觀萬順昌（1001）以每股1.80元配售3300萬股，比原先計劃的3000萬股多咗10%。黑客話係因為認購反應理想，而接貨者大多是芬佬，主要諗住坐番一年半截，所以噚日復牌沽壓唔算大，股價跌3.65%至1.85元，成交達7929萬元。
修身堂（8200）首日掛牌，股價表現異常靚仔，其靚靚指數，拍得住公司一班靚女代言人，股價全日升逾2倍，收報0.78元，成交2922萬元。
睇嚟貨源已經歸晒邊，基本上係要炒幾高有幾高，至於幾時應該跳車，就要睇下揸lift人嘅心情。
阿 虎