到底喺平機會前主席王見秋辭職前一晚同何志平嘅密會中，發生咗乜嘢事？有冇人傾到抹黑胡紅玉？民政事務局局長何志平日日俾議員追問，佢就好似玩緊「擠牙膏」咁，日日講啲啲，噚日先爆出當晚密會除咗自己同王見秋、鄔維庸以及行政會議成員廖長城外，重有一位第五者「王女士」，係呢位王女士邀請佢同王見秋會面，後嚟何志平又搵番王女士約會秋官。
各方紛紛打聽佢係何方神聖，有人估可能係王見秋女兒王穎妤。其實呢位王女士的確係當晚其中一位與會者嘅親屬，不過唔係王見秋，而係廖長城弟弟廖長江太太王沛詩大律師。《蘋果》記者當晚喺告羅士打大廈現場等，見到王沛詩好似主人家咁先送王見秋離開，跟住陪何志平等一齊走。
八方求證於何志平辦公室，發言人證實王女士正係王沛詩，亦係今年特首新委任嘅平機會委員，不過密會地點係咪廖長江同王沛詩嘅律師樓，發言人就以私人聚會為由唔講得。
（圖）王見秋身後嘅就係王女士--廖長城細佬廖長江嘅太太王沛詩大律師。
傳真︰2623-9278
電郵︰