熱錢流入之勢好急，噚日下晝，金管局又要出招，接咗兩個沽盤，合共1.5億美元（約11.63億港元），令到聽日本港銀行體系結餘升到114億元。
熱錢入咗嚟，坐定定，似在擇肥而噬，銀行體系因此水浸到幾乎沒頂。熱錢湧入，表面原因係炒港元升值，但最終目標，可能係股市同樓市，呢輪股市滑落，正好為佢哋提供低吸機會。
噚日港股跟外圍急挫，一早就裂口低開200點，恒指險守11800大關，收市11872，跌154點，成交132億元。期指收報11845，下跌152點，低水27點。
大市噚日再跌，走勢已明顯轉弱，家吓恒指10日線（12082）已跌穿20日線（12093），兩條線亦向下，相信50日線（11731）的承接力亦未必經得起考驗，以調整升浪（8331至12537）的0.236倍計，相信恒指要跌到落11544水平才有較強支持。
大市今次調整，真係千呼萬喚始出來，到目前為止，恒指由高位回落已有700多點，估計大市調整最少會維持到今個月底，但幅度不會大，畢竟貨源已嚴重歸邊，基金同大行擁有絕對話事權，點會刻意造低嗰市，畀一眾等入市已等到頸長嘅投資者買到平貨。
前晚美股本來升得好好哋，點知布殊一出聲，話要向中國部份紡織品實施配額限制，杜指立即掉頭而落，而市場擔憂設限會窒礙經濟復甦，連美元亦散埋。
布殊以高姿態向華實施貿易制裁，無非係政治考慮，為明年的大選鋪路，呢一場爭拗，起碼會搞三幾個月，最終相信都唔會發生貿易戰，但中美兩國貿易摩擦日趨嚴重，肯定唔係好事，紡織股噚日就首當其衝，全面下跌，跌幅普遍3至4%，德永佳（321）沽壓最重，收5.25元，大跌6.25%。近期棉花價格上升，原料成本昂貴，加上中美貿易糾紛的不明朗因素，對紡織業經營不利，紡織股的投資前景，須作重新估計。
郭兆誠