美股散，美元又散。本港有美元兌澳元、歐元同日圓窩輪，4件Call，4件Put。美元有波動，相關窩輪自然有郁動。
睇好澳元，可買澳美Call輪9280，隻輪昨日彈升13.4%，收28仙，有11球易手，明年7月底到期，溢價0.4%，槓桿率20倍。純表面數據睇，好值得買，不過澳元兌美元近期創5年幾新高，驚唔驚有獲利回吐？
睇淡澳元，買澳美Put輪9281，昨收20.1仙，散10.3%。明年9月到期，缺點係成交少，溢價高達9.5%，要澳元散得夠勁先有錢賺。
睇好歐元，買歐美Call輪9880，隻輪昨日大升40%，收28.5仙，明年2月到期，溢價1.8%唔算貴，槓桿率32.5倍有爆炸力，要考慮嘅係歐元升得咁急，會否高處不勝寒？
睇淡歐元，買歐美Put輪9827，明年1月到期，時日有限，溢價6.6%過高。如兩個幾月內歐元唔肯回落6.6%，揸隻輪最後就要輸錢。
睇好日圓，買美日Put輪9155，明年4月到期，溢價3.2%，槓桿率24.2倍。呢件數據比較實際，缺點係交投唔多。
睇淡日圓，買美日Call輪9828，隻輪明年2月到期，溢價10.4%，槓桿率517倍。隻輪去到尾作廢居多，因為到期前美元兌日圓唔易反彈10%以上。
章 盛