星期日晚上，揸車返屋企之際，手機響起，乃賓架陳來電；講一句：「天妒英才。」左丁山立即問：「誰是英才？」賓架陳只講了一句：「林振強去咗」。左丁山呆咗半秒，立即打電話求證，得知林振強因癌症逝世，以後各位都睇唔到佢嘅抵死幽默詐儍反諷嘅過癮專欄咯。
林振強首先係廣告界創作奇才，早已闖出名堂，後來肥佬黎欣賞佢，請佢入佐丹奴負責創作（creative），佐丹奴早期啲宣傳口號，多出其手筆，到咗九○年，《壹週刊》創刊，林振強亦包辦《壹仔》的宣傳口號！例如「壹」週刊嗰名就係佢諗出嚟嘅，「不扮高深，只求傳真」亦然。壹仔編輯每個禮拜都怕晒林振強，皆因每星期四下晝鋤書大會，肥佬黎下令宣讀林振強之每周批判書，猶如讀聖旨，俾佢批評為「悶」、「唔好聽」、「呃秤」、「圖片曳」、「唔知講乜」嘅文章插圖，一定飽受教訓，鬧多幾次就俾肥佬黎照肺，分分鐘冇得撈。
而今林振強去矣，佢在肥佬黎心中嘅地位，相信好難搵人代替，幸好《壹仔》、《蘋果》已經長大成人，創下與別不同嘅風格，好有生命力，不會因為任何人之消失而受到影響。
林振強在左丁山眼中，係一個特殊奇才，佢係番書仔一名，留學美國自學中文，填歌詞極有意境，創作口號往往簡簡單單，一針見血；寫專欄，思潮如海闊天空，「老作」源源不絕，左丁山與佢有數面之緣，交情甚淺，不過曾經有過工作關係，亦讀得佢嘅專欄多，對佢嘅逝世，遺憾遺憾。