屍爬挺董愛心大行動，國家推出第二炮，將香港變為人民幣兌算消費中心。七月十四賑濟餓鬼，就話要散錢啫，國家今次賑濟六百萬災民，大散人民幣，都咪話對香港人唔住。六十年代，香港人送生油寄棉衲，到咗二○○三年，國家就揼水同阿董洗白白，香港人種善因，今日終於得善果，佛家智慧現世顯報，宗教嘅嘢，真係畀到人好多啟示。
阿董就開心到幾乎標眼淚，吹雞Call齊班司局級高官，好似啲𡃁齊齊向阿公拜年咁，福如東海，壽比南山，人人念口簧。又係喎，區議會選舉在即，民建聯蔡素玉被自稱知識分子報章踢爆以權謀私，維港搞騷，私人公司代辦，國家唔幫吓手冚一冚，阿董啲弟兄姊妹又有難。
人民幣自由行，有就梗係好過冇。銀紙嘅嘢，多極都唔嫌多，多啲人民幣流通，就吸引多啲祖國同胞落嚟救災。喺心理上，多隻人民幣，就令香港人覺得真正回咗歸。不過，如果國家送佛肯送到西，俾馬會都開放埋人民幣投注，維護祖國同胞賭馬嘅人權，馬會利潤多啲，嘔番多少出嚟，又係津貼番啲新移民嘅醫療教育。所以唔好以為淨係益晒香港人，銀紙、人流、體汗、口水，中港大融合撈埋一堆，睇你班港英餘孽重點樣懷念殖民地？
既然係咁，阿董不如慎重考慮吓佢老友（希望真係）吳光正早排提出嘅正式採用人民幣嘅主張，早日廢除港幣，配合國家盡早派人落嚟出任特首接管香港。
阿董噚日笑到見牙唔到眼，好耐未見過佢老人家咁開心。多年前佢經營東方船務，搞到幾乎破產，都係多得國家透過老霍揼水救命，今日阿董做特首嘞，都重係要國家水吊命。嘿！共產黨前世真係欠阿董好多，今