威爾斯可唔可以歷史性打入歐洲國家盃決賽周，球迷同我求大俠一樣，睇埋今晚就知。俄羅斯首回合唔可以領先，作客自然形勢被動，所以近日不斷用「爛仔招」，希望傑斯停賽。
事緣傑斯上回合同對手伊斯夫爭波時有爭執，涉嫌向對手打踭，俄羅斯足總重話要親自寄番盒錄影帶畀歐洲足協，要求判傑斯仔立即停賽，等佢無得踢今晚次回合賽事，可以公平下競爭。不過，我求大俠覺得，俄羅斯咁做，反而真係有驚輸，同驚傑斯心態，如果認為有實力贏波，就唔使好似打官司咁，頒禁制令咁要人停賽喇！未踢先輸心理，我求大俠覺得，威爾斯今晚都真係有機會創造歷史性一刻！
俄羅斯作客威爾斯自然係焦點賽事之一，對俄軍老將安洛高嚟講，原來重有「秘密任務」，就係有傳佢會同保頓密斟，有無機會一月份球員轉會市場重開時加盟。雖然安洛高今年已經三十四歲，可唔可以應付英超聯值得商榷，但保頓領隊艾拿迪斯連久違了法國「變色龍」巴亞都要，我求大俠都唔敢講無可能！
挪威雖然喺首回合敗走西班牙，但只係輸一比二，故重有機會出線決賽周，不過，佢哋足總高層就唔係咁睇。挪威教練森比喺早前話過，如果球隊出唔到線就會辭職，𠵱家雖則未有結果，但挪威足總就認真唔畀面，竟然同洛辛堡教練赫里迪斟過檔。挪足總喺賽前做埋咁影響士氣嘅嘢，球員邊有心機踢呀！唔怪得本報名家華度再推西國贏二比一啦！
荷蘭最近真係黑仔到暈，又輸波又內訌，而翼鋒尹達美迪重無端白事撼親個頭。話說尹達美迪喺禮拜一接受訪問時，因為血壓太低關係，搞到突然暈低；最慘佢個頭重要撞落支咪度，搞到暈得一陣陣。好彩，佢嘅傷勢唔算太過嚴重，但佢所屬球會國際米蘭就警告荷蘭，千祈咪派佢落場鬥蘇格蘭！但荷蘭呢場要贏，睇怕對國米一於少理。