股壇長毛DavidWebb噚日馬不停蹄，去完信和置業股東會，即刻趕過海參加大藍籌新鴻基地產股東會。打工仔最關心份糧，Webb都好關注新地董事酬金。
話說新地提議今年董事酬金每名四萬、副主席五萬、主席六萬。Webb就問，點解唔喺年報披露。新地主席郭炳湘回應，新地董事酬金係同級上市公司中最低水平，而且十年冇變，但會考慮Webb嘅提議。唔知係咪發覺，原來大藍籌主席都凍薪十年，所以Webb亦承認新地董事酬金屬低水平，所以只要求新地日後披露各董事酬金。
為應付Webb踩場，新地早一個月已打聽佢會點搞。知道Webb例必要求逐票點，所以就唔用一貫舉手投票形式，點知Webb居然問郭炳湘係咪因為招呼佢先咁做，佢要考慮係咪年年都要嚟。郭炳湘都唔讓佢，直認只此一次。
傳真︰2623-9278
電郵︰