近年，德國寶馬車廠先後為旗下多款車系推出新一代型號，當中包括屬旗艦級嘅7系及走行政房車路線嘅5系等等；而響最近，外國方面就有消息指廠方正為旗下3系研製新版本，並預計會於明年推出。
從預想圖可以睇到，有望響明年推出嘅全新寶馬3系，其造型頗有同廠新5系嘅味道，當中一組低斜、並以雙圓燈配搭示人嘅頭燈組合，就最能夠將呢個特點展露出來，與此同時，流暢嘅車身線條及全新尾燈組合，亦能夠畀到你一份難以抗拒嘅魅力。至於車廂方面，則暫時未有太多關於呢方面嘅資料，但一般相信新車嘅車廂布局定屬全新配搭，而且重會配以一套先進嘅i-Drive系統，加上闊落嘅車廂空間，從而為乘客提供一個既舒適，享受又高嘅乘車環境。另一方面，廠方又會為用家提供多個引擎配搭選擇，當中包括2.0及2.2公升直4型號、2.5及3.0公升直6型號，而頂級版嘅345i型號，更會起用一台4.5公升V8偈，以滿足不同用家需要；有興趣嘅車迷，不妨拭目以待喇！