何超儀同陳子聰日前喺澳洲墨爾本舉行咗一個童話式嘅婚禮，兩人有情人終成眷屬，雖然佢兩個都係火爆嘅人，但係婚禮期間唔止收斂晒平時嘅脾氣，而且重好合作㖭。
超儀同子聰喺婚禮上面對雙方家長時，都嚴肅起嚟，頓時變晒紳士同淑女。不過估唔到兩公婆喺前晚返番香港後，火爆脾氣又即刻現形。超儀同子聰見到記者喺機場接機，面色即刻變黑，子聰推住行李車行先，而超儀就避喺四名保鑣中間，對記者嘅鏡頭好迴避同抗拒，亦不瞅不睬。記者追訪期間，更有八卦巿民暗寸超儀話：「嘩！大明星呀！」
子聰同超儀成班人入𨋢準備離開時，有一名攝影記者嘅相機鏡頭唔小心撞到子聰背脊，佢即刻摸住個背脊作痛苦狀，於是個攝影記者就好識做咁道歉，本來好似想鬧人嘅子聰先吞番啖氣。
馮仁昭覺得子聰呢啲行為唔知係咪真係有性格，不過就認真難明，可以肯定嘅係佢同超儀絕對係物以類聚。
亞視噚日安排劇集《暴風型警》一班藝員陳法蓉、尹天照、珈潁等去到元朗南生圍為捉鱷專家打氣，珈潁重着低腰褲、貼身衫去睇鱷魚㖭。
幾位藝員坐街渡過河，用個網仔撈吓水，但始終唔見鱷魚蹤影。好彩佢哋冇落水，否則成為鱷魚午餐就唔抵啦！
張堅庭嘅媽咪本周日喺將軍澳醫院去世，享年八十四歲。張堅庭噚日喺電話訪問話：「媽咪一直都長期有病，佢有老人癡呆症同糖尿病，佢彌留時都係唞咗幾啖氣就走咗。」張堅庭會同家姐商量媽咪嘅身後事，佢又話：「媽咪係基督徒，我哋都會盡量幫佢搞好簡單嘅出殯儀式，我呢幾日會同媽咪作一份悼文。」
楊千嬅主演嘅《安娜與武林》排喺聖誕節上映，又南都有份做，重同千嬅有場咀戲㖭，對又南嚟講拍咀戲可能會比較緊張，反而千嬅就冇尷尬。
雖然千嬅係票房保證，但馮仁昭就睇高千嬅另一部作品《地下鉄》，因為梁朝偉拍嗰陣畀咗導演馬偉豪唔少意見，加上部戲係王家衛監製，改編自幾米作品，點都有可觀性嘅。
古天樂、關心妍同莫文蔚噚日到尖沙嘴出席新城活動，古仔收到一隻戒指就話希望可以早啲結婚，佢話暫時未有意中人，所以會以工作為重，一向公認靚仔嘅古仔又話：「結咗婚後我會好專一，我𠵱家未到婚前階段，所以就唔知。」馮仁昭心諗古仔如果開腔話要結婚，肯定大把女仔應承！
