賣日本原宿嘢嘅水貨店愈開愈多，個個都話做水貨佬，其實有冇咁多客幫襯？聽銅鑼灣水貨舖嘅靚女Sales「藤原紀米」講，如果只靠散客，相信連舖租都唔夠交，家陣大多做得住嘅水貨舖都靠熟客關照，水貨老闆照熟客Order過江執貨，生意至有保證。最近行內有位被稱為「波鞋界貝聿銘」（以下簡稱波鞋銘）嘅超級大豪客就養活唔少水貨老闆。「波鞋銘」有幾巴閉？且聽「藤原紀米」講佢嘅故事：「所有原宿嘢同關刀嘢佢都啱，而且子彈十足，佢係全港唯一有齊成Set十幾對Atmos鐵絲網鞋嘅人，聽講每個款都有一對或以上，淨係呢度都使咗近三幾萬喇。所有水貨舖老闆見到佢都好似螞蟻摟蜜糖，『袁仁祥嫂』見到佢就笑得最燦爛，棚牙好似噴咗反光油咁靚，因為佢次次落親去都買成萬蚊嘢走，就算唔啱Size都買，話用嚟送畀人。𠵱家一有新嘢出，行內各老闆都搶住Call佢，睇吓佢留唔留貨？聽講佢係開婚紗舖，舖頭名係一座建築物，同貝聿銘有關。」
主持人：大食Jack
八卦熱報：