連我羅拉都講過唔少次嘅韓國MBC電視台古裝劇《大將金》，喺前日播出第十九集時，終於衝破百分之五十嘅收視大關口，比上一集高出三點四個巴仙，打破咗由宋慧喬主演，今年初喺韓國播出時有百分之四十七點七嘅《AllIn真愛賭注》，成為今年至威水韓劇。
由李英愛主演嘅《大將金》係講喺五百年前封建嘅社會，佢點由一個小小宮廷廚師，發奮成為御醫及皇帝身邊嘅紅人。
《All》劇要播到大結局先掀起收視高潮，英姐套戲播到十二集就過百分之四十，𠵱家只係播到十九集，重未夠全套劇嘅三分一，已經去到百分之五十，照個勢嚟睇，播到大結局分分鐘過埋百分之六十，難怪噚日啲韓國報紙全部都話英姐套劇今次有「魔之收視率」。
英姐早排呻為咗套戲塊面水腫到成個包咁，但當佢知道自己久別電視界三年後嘅復出作《大將金》竟然有咁好成績後，應該乜苦都唔記得啦！
其實韓國嘅電視界一向都將時裝同古裝劇收視分得好開嚟睇，《All》算係時裝劇範疇裏面嘅一哥，《大》就重要追擊二千年四月播出嘅《許浚》刷下嘅百分之六十三點五嘅紀錄，不過睇個勢相當easy。
套劇未拍完就咁收得，英姐都好識做，早兩日佢重自掏腰包，買咗大批厚褸畀拍攝組人員，英姐話冇贊助商肯送，但係為咗工作人員冇計喎！