有班外資行分析員，失驚無神推出一系列報告，重新推介年頭炒得好勁嘅二三線工業股，確係令小初難以明白，貼近芬佬嘅經紀黃有一個陰謀論，就係好多芬佬坐落大量工業股，根本未散得晒，由於挨年近晚，又係櫥窗粉飾之時，家陣造定個勢亦差唔多。
不過，經紀黃今日品題嘅金山工業（040），唔係炒櫥窗粉飾，亦唔係炒批股，而係炒業績，兼且憧憬有勁抽股息派。
金山噚日在大利是機發布，中期業績公布日期在12月1日，股價即刻有反應，彈升9.76%，收2.25元，不過成交奀咗啲，只得129.87萬元。
經紀黃問小初，記唔記得金山在8月底曾經公布，旗下在新加坡上市的奇勝工業，向法國投資者出售澳洲業務及亞洲業務部份股權，為奇勝帶來最少近9億元收入。自從金山公布呢單交易後，佢知道有唔少投資者暗中密密收貨，博奇勝會向金山派發特別股息，然後金山再分錢畀股東，所以噚日一宣布下月公布業績，股價即刻受刺激急升。
慕容小初