跌後股市，非常反覆，恒指時正時負，埋單有30點進帳，守住萬二點大關，未來走勢，主要都係睇美股。
和黃（013）負面消息不絕，昨日再跌1.25元，收55.75元；3日加埋，散咗3.50元，相信已反映不利消息嘅因素，亦都到咗超賣地步。固然，超賣之後再超賣嘅可能性存在，不過睇吓中移動（941）彈番20仙，聯通（762）升番15仙，和黃係半隻電訊股，因超賣而反彈嘅可能性更高，可以趣趣哋博吓Call輪，對象係9914，明年1月到期，輪價40仙，溢價5.8%，槓桿率13.9倍。另一件和黃Call輪9077昨跌5%，冇9914跌11%咁多，明年3月到期，輪價28仙，呢件係封頂輪，封頂價63元，距離正股現價有13%，都可以諗吓，但成交冇9914咁旺。
聯想（992）月頭派半年成績表後，市場唔收貨，股價由最高位3.80元嗰頭散落嚟，前日觸及3.10元，昨日有勢，收3.175元，彈番兩格，似已見底，有望出現技術性反彈。美國科技股呢排似過山車上落，散一輪之後如果彈番上去，聯想亦會跟住好好睇睇。
聯想Call輪9224、9217、9289，溢價28%至43%，就算槓桿率會飛都買唔過，要賭，就賭隻9659，重有1個月命仔，炒嘅話至緊要快手快腳。
章盛