04年手機大氣候非內置鏡頭莫屬，不論大廠細廠都猛推影相手機。而日前Dbtel就喺廣州大搞新機發布會，盡Show04年新機，內置鏡頭手機更佔去大部份，揭示04年手機大趨勢，而且論外形比歐美日韓等大廠毫不遜色，大熱功能兼具輕巧優點，各位中、港、台Fans又係儲定錢嘅時候！
記者：劉耀祥 攝影：林栢鈞
西門子SL55的推蓋式設計對手機界的確影響深遠，採用類似概念的機種如雨後春筍。Dbtel呢四款8系手機亦採用類似設計，兼且功能亦更進一步。雖然場中展出全部只係模型，未有真機試玩，詳細規格亦未有公布，不過亦都已經令在場人士流晒口水。四款8系手機風格各異，對斯文或前衞的用家都照顧周到，而且體積更十分輕巧。從展示機中可睇見機頂鏡頭可作旋轉拍攝，以及兩吋大芒，估計6萬5色TFT芒及40和弦都係指定動作。四部新機預計04年推出市場，期待度亦屬爆燈之列。
三款在功能上相若嘅影相手機，當中較高階嘅M7、M8早前已於台灣發布，單睇規格就已經相當吸引，包括播放MPEG4、藍芽、MP3及影相等，完全玩盡多媒體。雖然同屬多媒體手機，不過M7及M8在功能或規格上亦各領風騷，首先M7擁有內外26萬色TFT芒及64和弦；M8則具有SDIO插槽，實在令人難以抉擇。而J系列則分有J7及J8兩款，分別在於J7為雙色OLED外芒；J8則有6萬5色OLED外芒。兩者較為適合只要影相功能的用家，30萬像素CMOS鏡頭加閃光燈，最特別係機身前後均設有頗大嘅喇叭，相信係大大聲聽歌睇片之用。另外40和弦、6萬5彩芒、JAVA及MMS亦唔少得，預計04年上半年會現真身，到時影相手機又有一場激戰。
制式：GSM900/1800雙頻
外芒：雙色（J7）?65,000色（J8）
內芒：65,000色（128×96）
功能：MMS、JAVA、GPRS、40和弦
體積：79×43×21.6mm
重量：91g
以前要玩影相手機，有財力之餘重要有手力，皆因影相手機體積都有番咁上下，不過Dbtel展出四款影相手機就大玩輕巧，只有直身機一半體積，細細部啱女士手形。而當中暫時只有J2有詳細規格，其餘三部就連型號都未有。不過淨係睇J2規格都絕對唔弱，雙6萬5色彩芒、內置30萬像素CMOS鏡頭、40和弦、MMS及JAVA等，有齊時下影相手機大熱功能。J2都咁「齊料」，相信其餘三部都唔差得去邊。而J2預計04年頭就會開賣，又有大條道理過年換新機，唔怕畀男朋友咋型喇！
制式：GSM900/1800雙頻
外芒：65,000色（80×48）
內芒：65,000色（128×96）
功能：MMS、JAVA、GPRS、40和弦
體積：66×37×23mm
重量：70g
