港股噚日原本持續下跌，早市跌近11800水平，點知午後阿董突然宣布，香港銀行經營人民幣業務有定案，香港銀行明年可以正式經營人民幣業務，刺激銀行股造好，港股轉跌為升，重上12000關口，收報12027，升30點，成交回升至138.65億元。
中銀香港（2388）一度炒高近8%至14.50元，再創上市以來新高，雖然尾段出現獲利回吐，升幅仍達4.8%，收14.10元，成交高達9.77億元，反映鑊氣開始番嚟。
央行尚未定出本港人民幣結算行，但金管局唔打算爭做結算行，所以市場預期結算行地位非中銀香港莫屬，但奇怪係渣打（2888）王冬勝走出嚟話，一定會申請做結算行，究竟係想同中銀爭，定係央行會定出多過一間香港銀行做結算行呢？如果渣打真係可以做結算行，相信會幾出人意表。渣打噚日跌1.2%，收121.50元，消息對股價並無刺激作用。
寰宇國際（1046）配售1.9億股後，噚日復牌，股價一度跌破配股價0.20元，低見0.197元，但金利豐入市維持秩序，托番上0.209元收市，跌幅收窄至5.4%。萬順昌（1001）據聞因為文件手續未搞掂，所以噚日未能復牌，但聽講有人已搵齊人，睇實配售嘅3000萬股。
彩星（635）停牌配股抽水，配售1.3億股，每股1.60元，集資2.08億元。里昂早排出報告唱好彩星，目標價睇兩蚊樓上，昨日配股由里昂經手，基金接貨，如守得住配售價，後市可以睇好。
阿虎