英國首席小生曉格蘭特（HughGrant）主演嗰套愛情喜劇《真的戀愛了》，前日喺倫敦里斯特廣場舉行首映禮。呢套由十個愛情故事撮埋一齊嘅電影，係動員英國最紅嗰批演員拍攝，前日個首映會梗係盛況空前啦！
喺前晚首映未開始之前五個鐘頭，已經有幾千個fans喺場外排隊等睇星，喺新片扮首相嘅曉格蘭特，拖住喺片中幫佢斟茶遞水、繼而拍拖嘅英國電視當紅女星瑪天妮麥格倫（MartineMcCutcheon）到場，fans一見佢哋兩個就嗌到拆天一樣。瑪天妮見到場面咁哄動，重話死而無憾喎！我羅拉就覺得誇張咗少少喇！
另外，做過《我愛碧咸》嘅姬拉麗莉（KeiraKnightley），亦都有份參演套片，佢當晚着住套corset露背晚裝現身，不過佢全程着住件大褸，死都唔肯除落嚟益吓大家，真係孤寒！
不過講到最矚目嘅人，就莫過於喺新片扮過氣Rock友嘅標歷基（BillNighy）啦！佢當晚自費請咗六個作聖誕熱女郎打扮嘅model陪佢到場，謀殺咗唔少菲林。
因為今次首映係為咗慈善基金ComicRelief籌款，愛瑪湯遜（EmmaThomson）、哥連卓夫（ColinFirth）等演員同埋《PopIdol》參賽者統統都有撐場，真係星光熠熠。