拉登嘅恐怖襲擊陰影餘威猶在，日本遭到恐嚇，日股即大跌380點，拖累亞洲股市下挫，港股雖然不受恐怖襲擊威脅，但見日股咁跌法，都咪話唔心寒，結果恒指大跌206點，收報11997。
最近唔少公司配股集資，但反應唔算太理想。萬勝（376）原本諗住泊到信息產業部呢個大碼頭，可以容易啲抽水，但配售反應一般，只售出9520萬股，比原本計劃嘅上限少15%。
噚日又有兩間公司停牌傳抽水，其中寰宇國際（1046）傳會以先舊後新方式配售1.9億股，每股作價0.20元，抽水3800萬元，由金利豐包銷，據聞已搵到有心人坐盤。萬順昌（1001）亦傳先舊後新配售3000萬股，每股配售價為1.80元，集資5400萬元。由於集資規模有限，芬佬應該都食得起，但港股形勢欠佳，兩股復牌後點都會打個冷震。
中銀香港（2388）打晒開口牌，幾乎話自己一定可以做人民幣結算行。不過，市場對此冇乜反應，股價噚日跌1.8%，收13.45元，成交2.24億元。今次銀行公會北上，照睇應該會帶來利好消息，若在市場游資充裕時，資金肯定會借此炒多中銀一轉，可惜現時港股成交動力明顯轉弱。
明倫集團（346）噚日有開車迹象，股價勁升13.4%至0.295元，成交增至2075萬元。早前市場追捧國內化工股，明倫亦屬化工股，但股價甚為落後，國企股有回軟迹象，資金將轉追落後股。但明倫先前配售1.7億股，每股0.21元，獲利貨隨時出籠。
阿虎