香港天氣愈來愈怪，話凍就凍，轉涼竟然毫無先兆，突然間想打邊爐又唔知個火鍋煲收埋喺邊；想沖杯咖啡暖吓肚，點知部咖啡機原來老早報銷！以上種種絕對唔係大問題，海港城明日起至23號舉行超值家品大展銷，全場廚房用品低至1折，重唔霸定頭位，火速搶購？
記者：何善華
攝影：陳盛臣
模特兒：Ling（Imagine）
見到平靚正廚具用品，師奶們一定笑逐顏開，今次各類廚房好幫手割價傾銷，唔該有定心理準備大把人搶，唔想空手而回，睇怕點都要擔定櫈仔排隊等開門，至於使唔使捱眼瞓排通宵，咁就自己諗咯，要第一時間買心頭好，點都要付出代價嘅。
必掃平到笑廚具
廚具套裝，包括大中細不銹鋼雙耳煲，煮公仔麵或者煲湯最掂，重有平底鑊和普通鑊，煎炒燜燉炸點煮都得，買咗返屋企驚唔識煮？唔怕，送埋本原廠食譜畀你，咁就咩珍饈百味都煮得掂喇。
要食熱烘烘的蒸魚或者炸大蝦，買隻大鑊屋企都整得到，蒸炸兩用，又係3折唔使就可以托返屋企。
圓頂蓋蒸蟹鍋
近幾年多咗香港人鍾意食蟹，與其出街食咁唔經濟，不如試吓自己落廚慢慢炮製，蒸蟹鍋可放4至6隻蟹，一家四口份量啱啱好。
壓力煲容量大
名廠KuhnRikon出品雙耳高速壓力煲，絕對係信心保證，重有10年保養唔使驚「爆煲」無得賠，6公升容量夠一次過煲靚湯畀全家大細飲喇。
袖珍家居無位擺廚房用品，好簡單啫，一個迷你電飯煲可幫到手，啱晒年輕夫婦一齊撐枱腳。
廚房缺少一部電烤箱，點算得上Perfect呀？烤燒雞、焗Pizza、魚、餃子、牛扒瓣瓣掂，4折開倉抵到爛。
水壺飯壺半價割引
𠵱家唔係用茶煲煲水嘅年代，好多電器已經電腦化，最緊要方便快捷，電腦電水壺㩒個掣就有熱水供應，3公升容量夠飲有餘。
「聽日帶唔帶飯返公司呀！」要返工帶飯歎老婆住家菜，點少得呢個2公升容量保暖飯壺，有齊小湯碗、小盛菜盤、筷子，好方便。
真空鋼膽壺
1.5公升容量，可吊繩式或手柄式攜帶，外形夠酷，真空鋼膽設計具保暖效能，旅行或家用都得。
小巧型飯壺啱晒食量有限嘅瘦身女士，19蚊就有1個，認真唔話得！
勁平家電家具掃埋佢
屋企有部一站式咖啡機，歎咖啡唔使下下要去CoffeeShop，即磨滴濾咖啡機分分鐘沖得更好味。
開大食會，又點少得1套刀刀叉叉呀，鐵製刀叉經濟又環保，全盒有刀、叉、湯匙、小匙及小叉5款共20隻，外形美觀，附有鐵盤盛載。
飲白蘭地最啱用水晶杯，精瑩剔透盡顯貴氣，平價88蚊有齊1套，必掃之選。
廚房重地，點少得一個垃圾桶呀，時值煮飯黃金時間，手忙腳亂丟垃圾最緊要就腳，一踩腳踏垃圾桶即開，方便到極。
海港城展銷集（21188008）
地址：尖沙嘴廣東道11號世界商業中心3字樓
排隊攻略：「超值家品大展銷」於明日至11月23日共5天舉行，市民可於世界商業中心地下排隊等候入場。
