娛樂圈好多明星名人，都係喺單親家庭長大，好似天王巨星咁，因為佢阿爸一早拋棄咗佢哋一家人，巨星就係由媽打一手帶大，亦因為咁佢對拋妻棄子嘅爸爸完全冇好感，而佢媽打亦對男人冇乜期望，咁多年嚟雖然都有男人想追佢媽打，但佢媽打始終不為所動，其實巨星都幾孝順，一直都唔反對媽打再嫁人，可惜始終唔見媽打有對象。
後來巨星先發現媽打成日同一個住喺跑馬地嘅女伴一齊，兩個人嘅態度好曖昧，親密到好似男女密友咁，有時重會喺呢個女伴屋企留宿。馮仁昭聽講，巨星個心知道媽打嘅取向後，佢冇出過一句聲，因為佢覺得媽打年紀都咁大，總之，佢做嘅嘢覺得開心就得。哈！又睇唔出巨星原來咁開通喎！
李克勤噚日喺黃埔海逸酒店宣布新碟《度身訂造》已直迫白金銷量。問克勤今年係唔係賺咗唔少呢，佢話：「我都試過隻碟唔賣得，所以要積穀防饑，不過舊年攞到最受歡迎男歌星，真係帶畀我好多搵錢機會。我唔會俾人攞去，因為我唔捨得，我已經當佢係屋企人。」有個屋企人咁旺自己又真係唔錯呀！
王菲噚日去咗台灣宣傳新唱片《將愛》，佢會一直逗留到下個星期二（二十五號）。王菲噚日大約五點幾喺機場出現，佢着黑裙黑褸，重戴住黑超黑頸巾，真係由頭黑到落腳，見到記者影相，王菲都冇好抗拒，但係冇接受記者訪問就匆匆入閘，一貫佢鬼咁cool嘅性格。一去成個禮拜，唔知今次霆鋒又會唔會過去台灣會佳人呢？
陶喆喺嚟緊嘅二十二號會喺台北市立體育場舉行「DavidTaoSoulPowerTourConcert」，為咗要以最佳狀態同fans見面，佢每日都抽一個鐘出嚟做瑜伽同埋打坐。原來，陶喆學瑜伽已經有兩年咁耐，不過佢就好少練習，而且一開始佢重揀錯咗中高班，搞到有好多動作都做唔到，重要女同學幫佢手㖭。嘩！係咪有心揀錯㗎！
何韻詩最近因為操勞過度，谷火上嘴，搞到爛嘴，鬼咁尷尬，噚日佢就爛住個嘴去港台做訪問，不過就心情極靚，因為佢隻新碟有期出，十二月中就會有得賣，佢話：「今次隻碟個封套concept好特別，我會有好多角色扮演，重會有個好嬌俏嘅何韻詩出現㖭。」咁咪可以向佢師傅梅艷芳嘅百變形象致敬！
林文龍噚日接受薛家燕訪問，家燕姐除咗恭喜佢明年同郭可盈拉埋天窗，重即時踢爆文龍平時拍劇同一班工作人員都玩得好癲，不過喺女友面前就表現得好靜。另外，林文龍話都有諗過生兒育女呢個問題，不過佢就覺得香港嘅教育制度唔係咁健全，令到小朋友會有好大壓力。其實出國留學都好平常啫，文龍都唔使咁擔心嘅！
陳欣健嘅母親陳劉渭娟日前因癌病逝世，噚日喺世界殯儀館用天主教儀式出殯，遺體送往柴灣歌連臣角火化，而許冠文、岑建勳夫婦同埋劉天蘭噚日都有送佢最後一程，岑建勳更幫手扶靈。陳欣健透露會將母親心愛嘅念珠同埋靚衫做陪葬品，至於亡母嘅骨灰亦都會安放喺歌連臣角。
