著名填詞人兼廣告界鬼才林振強前日凌晨因癌症病逝，樂壇中人昨日聞此噩耗莫不感到震驚和哀痛。原來林振強所填的第一首歌，便是由陳潔靈主唱，陳潔靈昨日聞悉好友死訊，一度泣不成聲，對於林振強的作品，陳潔靈說：「佢寫嘅歌詞就好似同我傾緊偈咁。」
林振強是樂壇難得一見、才氣橫溢的殿堂級填詞人，曾創作過無數膾炙人口的流行歌曲，作品多如天上繁星。據樂壇中人透露，林振強是性格低調、天才橫溢的創作人，入行以來一直堅持不肯為歌手修改歌詞的原則，寧願人家不起用他的詞，也堅持隻字不改，但林子祥、陳潔靈和夏韶聲三位歌星兼好朋友則例外。
陳潔靈昨日在電話中提及好友生前點滴時，一度泣不成聲。原來，陳潔靈當年名作《風是冷》，正是林振強入行第一首填寫的歌曲，陳潔靈說：「佢係我良師亦係我好朋友，每次我出唱片，都會搵佢出嚟叫佢畀意見，佢對我了解好深，好簡單嘅字句已經好透徹，佢寫嘅歌詞就好似同我傾緊偈咁。我好欣賞佢寫嘅嘢同佢嘅為人，眼睇住一個一個好朋友離開，心情真係好沉痛……」說話到此，陳潔靈已忍不住泣不成聲。
另外，記者昨日又致電林振強的另一好友夏韶聲，他的心情顯得非常沉痛，他說：「陳潔靈噚晚打過電話話畀我知嘅時候，我擘大口得個窿，唔敢相信，我已經有幾年冇同佢聯絡，本來我就嚟出新唱片，諗住搵佢幫手填幾隻歌，估唔到以後都搵唔到！」
對於林振強只肯為他與林子祥、陳潔靈修改歌詞，夏韶聲坦言真有其事：「我一向叫佢林翁，佢係唔會同人改歌詞，可能我哋幾個算係同輩，所以佢會尊重我哋畀意見佢，好似佢同我寫嗰隻《結他低泣時》咁，原本歌名叫《死前一刻》，歌詞亦完全唔同，但我同佢講話『林翁，唔好唱到咁悲，悲都唔好講到死亡啦！』我講完呢兩句說話之後，林振強就二話不說咁同我寫過晒。佢寫嘅歌感覺好寫實，我哋好信任佢，完全唔需要同佢講咁多，佢就已經可以寫到隻歌出嚟。」
林振強過往為夏韶聲寫過不少佳作，其中《空櫈》一曲，更在八五年第一屆亞太流行歌曲創作比賽中奪得香港區冠軍，不過夏韶聲表示芸芸作品中，最喜歡還是《結他低泣時》，歌詞中將那份淒怨感覺完完全全地描繪出來。
採訪：戴彩煥
