消委會新任副總幹事劉燕卿噚日履新，佢話首要任務係喺資源緊縮下，做到節省開支但又唔影響調查工作；身為消委會第一批研究員，卿姐話消委會七四年成立時主力唔係做調查，當年物價飆升，主要係睇吓啲米價油價咁，重要每朝到全港街市格價，然後喺電台廣播，「我成日問完價又唔買嘢，俾啲菜販鬧。」
香港人生活後來改善咗，叫做有啲錢，消委會就開始做產品測試，八九年測試奶嘴，發現原來含有致癌物質亞硝胺，搞到全城母親哄動，廠商鬼殺咁嘈，重去立法會投訴，因為嗰陣冇消費品安全條例，消委會冇權做調查，消委會梗係企梗，結果係點？「我哋最後說服咗當局，政府之後重通過咗《消費品安全條例》㖭。」估唔到一個奶嘴影響力咁大。
董班子敗港六年，個口亦係含住一個由鄔維庸等土共供應嘅塑膠奶嘴，呢隻奶嘴重毒，阿董執生喇。
（圖）噚日履新嘅消委會副總幹事劉燕卿，話以前去街市格價，成日俾菜販鬧。
傳真︰2623-9278
電郵︰