話說賓架聚會，請法師演講。據主催賓架伍介紹，法師讀男拔萃、香港華仁，後到加拿大留學，主修政治、經濟、哲學，得碩士學位，從事勞工工作，後來先至成為出家人。
香港華仁畢業，似乎成為神父更有理由噃，點解會出家做和尚呢？法師話：「一切隨緣，我返到華仁，老校長?老神父亦問我呢個問題，佢問我點解唔做神父。我讀書時鄙視有錢人，討厭貧富懸殊，一心要為被壓逼嘅勞工請命，去加拿大最初就係讀勞工關係，點知一個偶然機會就因為一個教授嘅影響而改讀哲學經濟，碩士畢業後，預備讀博士班前先返嚟香港一行。又係偶然機會，碰到太虛和尚一位徒弟，我同佢講哲學人生，俾佢一句話點破內心，當下頓悟，後來就放棄學業，拜佢為師受戒。」
凡夫俗子終日營營役役，醫生精神專家話我哋受壓力太多、太大，要學懂如何減壓。法師致詞二十分鐘之後，送我哋一份禮物。法師話：「每日清洗煩惱，做到身心合一，與環境空氣合一，好易啫。坐在椅上，不可靠背，腰挺直，眼望鼻，鼻呼吸，不談話，熄電視收音機，心意集中，好快就進入忘我境界，每日做十五分鐘，一定可以鬆弛神經，減輕壓力。」法師嘅年紀六十歲多一啲，精神飽滿，問佢有冇講過粗口，佢話：「佛家不講信佛得救，只求在適當時候做適合環境嘅適當事，我曾排解勞工糾紛，同工人講粗口，因為當時環境，唔講粗口，大家難以溝通也！不宜墨守成規，一切隨緣。