國企指數期貨下月8日登場，炒友又多一檔嘢玩零和遊戲。
唔炒國企期指，亦可炒𠵱家喺市場有掛牌嘅國企窩輪，暫時只有Call而冇Put，掛牌個名叫做「中企」而唔叫國企，係賭國企指數上落。呢類Call輪共有7隻，其中4件因為指數已經大升或者較為近期，槓桿率得番1倍幾，已少人買賣，或者同發行商收番好多有關。
最多人玩嘅中企指數Call輪係法興發行嘅9048，行使價係國企指數3100（昨日收報3752），明年2月到期，輪價49.5仙，溢價2.3%，槓桿率5.1倍，數據算係咁，揸隻輪有冇得賺自然要睇未來國企指數係升抑或係跌。
另外兩隻同類輪9027同9049，壽命比9048長多半年，槓桿率差唔多，但要畀多5.2至6.6個百分點溢價。如果睇好國企股（即係睇好國企指數），炒9048比較適合。如果睇淡國企，對唔住，因為冇Put輪，要做嘢只好走去國企期指嗰檔。
個市受美日大跌拖累，恒指萬二點啱啱失守。認為恒指會繼續散落去，可以買恒指Put輪9133、9143、9241、9243、9145或者9249。
認為個市會反彈嘅，則買恒指Call輪9928、9104、9184、9230、9221或者9244。
章盛