失業率終於下降，因為「屍爬」有功，由百分之八點三，回落至百分之八。
不過，數字顯示，受惠行業係酒店、飲食、娛樂、裝修、零售呀等，而唔係電腦、會計、法律、設計等等實業同專業。換言之，「屍爬」幫到嘅，係服務消費性行業，唔係技術知識型嘅行頭。特首呢六年來，日日話要經濟轉型，希望香港人轉向知識型經濟發展，避免泡沫再現，日後再俾金融風暴閹多一鋪。
失業率下降，服務消費型行業受惠，當然係好過冇，但亦同時證明，國家幫特區，只可以幫到表面，幫唔到本質。好似一個乞兒仔，一身爛衫，兼骨瘦如柴，營養不良，國家所幫到嘅，只不過係畀少少錢，同個乞兒仔換一套靚啲嘅衫，個乞兒仔點樣增磅吸取營養，畀套衫佢換嘅嗰位善長，點都幫佢唔到。
所以經濟發展及勞工局局長葉澍堃今次就精嘞，佢只係話審慎樂觀。梗係要審慎，因為結構性嘅失業，根本冇改善。知識型經濟，亦未見影。
啲酒樓食肆、金舖百貨公司，最多請多幾個臨時工頂住，一路係咁觀望先，但嗰頭，年年大學生畢業照樣失業，一樣俾人㩒人工，自由行帶旺經濟？啱嘞，服務消費型嘅各行業，重要請多啲人㖭，有大把大學生任佢揀，請嚟捧餐、擔泥、做售貨員，三五千蚊一個月，撈唔撈吖？唔撈，重有大把人喺勞工處排緊隊喎。
國家幫特區，幫盡亦係咁。最多開放十三億人全部自由行好未？到其時都重係益番呢啲行業。律師、會計師、影視工作者，始終北上謀職係好有困難，例如新聞傳媒呢一行，記者編輯失咗業，唔通可以北上轉職去《廣州日報》？就算肯捱人民幣一千蚊都冇人敢請。
失業率下降，始終係虛火，特區終須要靠自己，但願生兒愚也魯，喺一個反智年代，原來愈有知識，失業坐艇就愈耐，讀咗書又點，高不成低不就，重痛苦呀。
傳真︰2623-9278
電郵︰