美版PS2人氣之作《EyeToy:Play》，在大家毫不知情下，已靜靜雞抵港，佢可以令你從一個「身」角度，認識乜嘢先至係「體感」Game！首先第一步係踢走晒所有甚麼跳舞氈、太鼓、光線槍同遊戲手掣，因為一隻感應「電眼」，就可以讓你用最原始嘅「身體語言」──拳打、腳踢、Fing頭、跳舞嚟解破遊戲一個個難關。
記者：朱崇德
攝影：蔡鴻雯
ImageGirl：Yuki（Space2）
這個《EyeToy:Play》係PS2首隻以Cam仔作媒體嘅遊戲，所以除了遊戲碟外，還有一個Cam仔附送。進入遊戲時，個鏡頭會一路影住你，所有揮手、Fing頭嘅動作都會感應得到，可當作輸入指令！譬如你進入主目錄時，會喺遊戲畫面上見到自己，並且有一個人形線框畀你定位，要選擇邊個選項，只需放隻手去嗰度不斷揮舞，就會輸入指令，幾似《DDR》溝街機《新宿24小時》！
講真，PC早在幾年前Logitech嘅WebCam都曾經附送過類似遊戲，不過由於當年WebCam反應麻麻，所以一直Hit唔起。今次《EyeToy:Play》已經完全克服了這方面的問題，鏡頭對你嘅動作簡直可以用超敏感嚟形容，再加上在陰暗環境下，重會有紅外線輔助照明，真係準到無倫！
據知《EyeToy:Play》在歐美等地反應相當熱烈！成功原因主要有兩點，第一，玩家可以實時第一身在遊戲上亮相，這是PS2遊戲上重未有過的突破，令玩家投入感大增；此外跟機的遊戲碟，內裏收錄了12隻Mini-Game，好似跳舞、抹窗、拳擊……等等，進行遊戲時你會見到自己好似癲咗一樣，喺電視機前又揮手、又Fling頭，個個遊戲玩起上嚟都非常簡單，一大班朋友齊齊玩時就更惹笑，難怪外國好多權威遊戲網站如IGN及GameSpot等，都選佢為最佳PartyGame！
由於《EyeToy:Play》暫時先推出美版，行版或日版PS2就玩唔到，不過喺嚟緊12月嘅亞洲遊戲展2003度，行版《EyeToy:Play》會率先現身，入場機迷可以親身體驗一下邊打機邊做運動嘅過癮之處。
呢隻Game感直頭係《DDR》加街機《ParaParaParadise》嘅混合體；源源不絕嘅CD，不斷飄向四隻角嘅喇叭，玩家要跟音樂節拍，等隻CD去到喇叭中間就摸佢一下！咁就可以取得最高分；揀選嘅音樂節奏幾強烈，可惜曲目比較少，選最高級時，難度非常高，CD碟不停係咁出，簡直勁過跳健身舞！
呢隻《MirrorTime》真係要畀個頭暈眼花獎過佢，佢會將畫面上嘅你，左旋右旋，然後反轉再反轉，然後你就喺呢個錯亂影像中，用拳打放在四個角的壞人（紅色）；不過佢間唔中會夾雜一啲好人在其中，打錯人就扣一條命！ImageGirlYuki玩唔夠3個回合就GameOver真係一味夠亂！有難度！
平時大家屋企最唔願做嘅事情，首選當然係洗碗碟、抹窗！不過化成Game又點睇！《WishiWashi》係抹窗遊戲，你可以用身體任何郁得嘅部份做！最啱成班人一齊玩！
「洗碗碟」就化身為中國雜耍嘅轉碟，畀真嘅你都唔敢玩！不過呢度玩包冇打爛！而且同一時間有成四隻咁多，真係少啲集中力都唔得！
原本12隻MiniGame，要完成一隻先玩第二隻，不過歐美等地已有秘技公開了，只要插上手掣（又話唔使手掣！），在選遊戲畫面輸入「上、下、上、下、L1、L2、L1、L2」，全部遊戲就可以即時任玩！
遊戲類型：體感動作
對應機種：PS2
遊玩人數：1人
開發商：SCE
售賣點：DreamStore
地址：灣仔東方188商場256號舖
電話：25753285
