將軍澳居屋面積最細只得200幾呎，但因為銀碼細，所以都吸引唔少買家買嚟投資，聽世紀21鄺志輝講，只有5年樓齡嘅寶明苑，最近就有個A座中層1室，282方呎嘅銀主盤成咗，自由市場價承惠45萬銀，呎價1596蚊，屬於市價。
樓盤過去半年都冇自由市場成交，第二市場最近1宗成交價係22.6萬蚊。𠵱家市場只有兩至三個第二市場放盤，叫價28萬。
鄺志輝話，呢類細單位，成個將軍澳只有寶明苑同顯明苑有提供，夾埋得3座，每座每層得4個，供應量有數得計。顯明苑早前有個高層1室單位成咗，面積286方呎，成交價43萬。
呢啲細單位月租可以造到3000蚊，計落回報有7至8厘，重好好租㖭，個零禮拜就租得出。原來有啲買家重係同區嘅公屋客，一次過付款買嚟收租，好過擺錢喺銀行。至於區內客入市嘅比例都唔少，佔咗一半。
樓市回穩，二手交投轉旺，買賣雙方都希望攞多啲樓市資訊做參考，而二手租售價同屋苑流通比率，已為市場採用多時，美聯今日就會公布一個全港二手放盤指數，反映二手市場嘅最新動向，畀置業人士參考。
聽講證券行摩根大通有就呢個指數，向美聯提出過一啲專業意見。
另外，美聯同摩根大通定期做嘅樓市調查，今年就由以往主要調查一手市場，改為做二手市場，集中調查二手放盤業主嘅心態，如對後市睇法等，訪問咗幾百個客，詳情今日就會公布。
睇嚟，一直表現不振嘅二手樓市應該會有起色，所以美聯至會咁積極睇呢個市場。
房委會上個禮拜截收兩幢空置居屋轉作旅館嘅興趣表達書，中原地產亦做咗個空置居屋用途網上調查，訪問咗390名市民，結果有37.6%受訪者認為，最合適轉做出租公屋；贊成做學生或政府宿舍嘅，就佔29%；支持轉做旅館嘅，都有21.9%。
至於空置居屋應否一次過批畀同一個財團，有近六成人反對，覺得應該斬件推出；贊成嘅只得約一成半；其餘認為應以證券化方式出售。
另外，有近51%人就認為，就算畀私人競投，都要分階段推出。
中區甲級寫字樓造價近月明顯反彈，用家計完數後，走去附近搵啲落後大市嘅寫字樓，上環信德中心就係目標之一。新世界持有嘅信德中心貨尾，都賣咗兩個單位，套現近4000萬。
新世界賣出嘅係東翼11樓一個11562呎單位，成交價3200萬，呎價2768蚊；另外17樓2582呎單位，就以749萬沽出，呎價約2900蚊。
中原郭朝隆話，信德中心嘅呎價高峯期同金鐘區有得揮，𠵱家就跌剩得金鐘嘅四成。
雖然話今日嘅地產代理要考牌，有專業資格至做得物業買賣，但係有時都會俾人考起。好似喺荔枝角美孚新邨後面山坡嘅九華徑村，某日有位村民阿伯到代理行放盤，諗住賣咗間村屋。
點知呢位業主手揸「紅契」，即係清朝祠堂做嘅業權登記，由於條村無成交可以參考，銀行估唔到價，做唔到按揭，今日要轉手做買賣，都唔知要搞乜手續，分分鐘要經過鄉事委員會批准，所以間代理行最後都冇接到呢個盤。
蘭西
電郵地址：
