董方卓有機會加盟曼聯一事曝光後，自然成為報道焦點，曼城孫繼海亦知道這個消息，重好有「前輩」風範，提點後生仔如果到英倫後，如何開拓新一頁。
孫繼海居住曼徹斯特市接近兩年，透露要喺英倫立足遇到好多困難，而佢知道大連實德「師弟」董方卓，有機會投身曼聯後，已經提前指點迷津，話同其他球員語言溝通問題最大，所以要多同隊友溝通，可以加快適應，盡顯前輩風範。
其實，董方卓早前到曼聯試腳時，孫繼海就因為係曼城球員，無得睇練波，只好約佢到市內見面。我求大俠有個疑問，如果董方卓加盟曼聯，咁兩隊打吡戰前，可唔可以通電話？
前車路士中場韋斯，現時就擔任甲組米禾爾球員兼領隊，最近佢就計劃收購一位叫做約翰瑟頓。邊個？原來佢係現時些路迪前鋒瑟頓嗰細佬，半年前先離開熱刺。我求大俠就唔多認識呢位仁兄，唔知韋斯仔搵佢係，諗住約翰瑟頓同大佬一樣咁有射門觸覺，幫球隊爭取升班？
大連市日前有一間專門收留孤兒為主嘅培訓中心成立，幫助照顧孤雛之外，亦加入足球培訓，從中尋找有潛質球員，希望為國家隊日後提供優秀球員；現時效力實德嘅王聖等人，都由今次負責人以往培訓出來。實德今屆攞唔到甲A冠軍，但大連市咁有諗頭，唔通想做中國第一足球城市。
英格蘭前晚友賽俾丹麥反勝，下半場條後防線就由車路士泰利、布歷治同格連莊臣三人壓陣，結果出現輸波局面。艾歷臣賽後就怪責後衞踢得差，太多漏洞。早前曾傳出艾歷臣可能執教「車仔」，今次狠批，莫非想向班後衞教定路，等班球員知道要求標準，第日執教時更方便？
英格蘭嘅新特蘭今季降落甲組角逐，球會知名度就急降，但主場光明球場就俾歐洲足協認可，列入可舉辦歐洲賽事場地，都算挽回聲譽。新特蘭自從降班後，因為財政問題，已經賣走好多球員，今次得到認可，總算有機會增加收入來源幫補吓，如果下季重返英超，都有「彈藥」買球員。