男藝人的衣着一般沒有女藝人的多變化，Boy'Z兩位少男Kenny和Steven日前出席公開活動時不約而同以褲鏈作配飾，雖然只是穿T恤牛仔褲，但腰間繫上褲鏈便不再單調。而Steven那條十三么麻雀褲鏈更是搶盡風頭。
近年不少年輕人喜歡在腰間繫上褲鏈作配飾，二人男子組合Boy'Z的關智斌（Kenny）和張致恆（Steven）日前出席公開活動時，便佩戴不同款式褲鏈示人。
Kenny以購自Scene的褲鏈襯絹面雙虎棒球褸，入型入格。而Steven則以歌迷送給他的十三么麻雀褲鏈襯Levi's牛仔褲及Everlast灰色外套，搶去拍檔不少風頭。
Kenny表示自己不捨得花錢買貴價服飾，每次到日本只會搜羅平價心水衣服，他說：「其實我覺得男仔有時真係冇乜飾物配襯，好似我用呢條褲鏈襯牛仔褲，睇落去就冇咁單調啦。通常男仔用褲鏈有型得嚟帶少少粗豪，但係身上千祈唔好同時間有其他吊飾，搞到一身都係鏈，好似爬山咁。」
而Kenny的絹質棒球外套亦相當有型，他說：「我見到好多日本雜誌介紹棒球褸，但係件件都要成萬蚊。有次去日本一見到呢件褸，只係賣六百蚊就即刻扑槌買。」
至於Steven，一向十分珍惜歌迷送的禮物，以這條十三么麻雀褲鏈為例，Steven扣在牛仔褲和銀包上，然後繫於腰間，睇得又用得。
Steven表示經常閱讀潮流雜誌偷師，他說：「喺書中可以學到唔少着衫技巧，好似我嘅身形咁呢，就千祈唔好着緊身衫，因為咁樣只會自暴其短，所以我會揀鬆身衫遮掩吓。」
採訪：駱華齡
攝影：仇志德
