民政事務局局長何志平出名識走位，但係上周三何、王、鄔、廖密會俾人捉正政治黃腳雞想閃都冇可能，搞到水洗唔清。
當日立法會開會，民政局好大陣仗，老何閃無可閃，親自披甲上陣，常秘李麗娟亦坐足四粒鐘，顯示團隊精神。只見何局長兵來將擋，水來土掩，一味多謝主席畀機會佢再背一次標準答案，死都話自己約見王官，只有一個任務，就係摸底，一知道王官肯當機立斷唔撈，就已經大功告成，但班議員死都窮追猛打，猛問佢有冇份參與抹黑胡紅玉。當時八方見到肥平扁晒嘴，好似好委屈咁。
原來後來先知道，肥佬平個日真係好唔開心，因為好似冇人信佢唔知情，完全冇參與乜嘢六宗罪，佢老哥日理萬機，由新界雙村長至賭波，瓣瓣上身，真係唔係好知平機會啲嘢喎。但𠵱家講乜都冇人信啦，老實講，肥平就算在場，都唔敢教人寫辭職信？你當秋官儍嘅咩，有人寫埋稿都唔讀啦。
傳真︰2623-9278
電郵︰