大鱷蒲頭，帶挈特區政府有少少轉運，接二連三拆咗幾個炸彈，首先係巨星匯，唐唐搶先成立委員會查數，冇畀機會啲尊貴議員發難；之後係令王官知難而退，肥佬平抹去一額汗，暫時冇大件事；前日，李國章更表現一場李校長向大學生「曉之以義，動之以情」嘅好戲，得到特首同周梁高度讚揚，大力推許。跟住手，失業率重下降㖭。阿董當堂醒晒，邊個重叫我落台？
其實對於身經百戰嘅拆彈專家亞瑟王嚟講，呢啲真係濕濕碎，當年佢喺港大前校長鄭耀宗出事後開記者會，已經知道高下。
講真，連幾十個十幾二十歲嘅𡃁仔都搞唔掂，點做局長？老董燒馬後炮，話同意李局長話香港大學生具質素，真係遲來的高帽，乜都要叨光。李家出品果然與眾不同。李國章同佢位親大佬銀行家李國寶永遠有驚喜，簡直係李家孖寶，呢啲肯定同優秀嘅家庭教育有關，包括與占士邦做校友嘅劍橋大學訓練。至於佢哋個堂兄弟李國能，亦一啲都唔失禮，董家、唐家、馮家以及另一個李家，真係望塵莫及。
傳真︰2623-9278
電郵︰