老友從溫哥華回港度假，住不了幾天便約我出來飲茶，不停的炒蝦拆蟹：「有冇搞乜錯？又話乜嘢經濟不景？又話乜嘢百業蕭條？又話乜嘢失業率高企？Recession?RecessionMyAss!」老友的情緒激動到隔籬枱都望過來，不禁問句老友香港有咩地方得罪佢，「返嚟之前諗住香港咁唔掂，今次重唔係可以做大爺？點知出街食飯，好食嗰幾間日日都要排長龍，冇人幫襯嗰啲就抵佢冇人幫襯，因為唔好食；諗住去Shopping，點知又冇減價，全部都係照原價，經濟衰退又點會唔減價得㗎？Recession?RecessionMyAss!」
有時真係旁觀者清，當局者迷，經我呢個老友講一講，當堂又覺得香港生氣勃勃，百業興旺。不過唔怪得晒我老友有咁嘅錯覺，因為北美洲嘅華語傳媒有個特點，就係喺報道關於香港嘅消息時，不知係有意定無意，總有點選擇性地報憂不報喜，所以移居北美洲日子夠耐嘅朋友，總係成日覺得香港好大鑊，好似唔住得人咁滯，如果華語傳媒係有意咁做的話，唔知係咪為咗令已在當地落地生根的華人（港人）更慶幸自己作了英明的抉擇，移居了無煩無憂的世外桃源，如果係又真係用心良苦。
重有，我嗰位「RecessionMyAss」的老友，經實地勘察後，決定下年回港搵食，據佢講係掘金，我介紹佢去公園內的狗公廁掘，大把！