教育沙皇大戰唐唐，慢慢開始有睇頭。論政治智慧，梗係我哋香港本土出身嘅李國章高幾皮。噚日大學生想同佢舌戰，上午俾政府總部啲實Q以人太多冇報名為名擋駕，點知下午我哋「亞瑟王」就話：即管放馬過嚟，不過你哋要搞清楚，係唔妥我李國章，定係想打倒以阿董為首嘅特區政府。
呢兩套散手，耍得好靚。學生運動，一向都衰在只有激情，未夠理智。好似「六四」嗰鋪，天安門廣場啲大學生，就唔知自己「為何而戰，為誰而戰」，一時又話反貪污，一時又話要民主，一時又話要李鵬落台。焦點校唔準，主題太鬆散，整整吓就變咗情緒化，俾人舞龍咁舞。嗱，李國章今次就袋咗好多錢落學生個袋度嘞，佢嘅意思都重係：我都係同大家一樣反對削減教育經費嘅，如果想抗爭落去，問呢個政府攞錢喇。
善導學生嘅情感，可以鬥垮政敵，當年老毛就係利用紅衞兵鬥倒國家主席劉少奇。李國章一句「如果罷課可以阻止到削減經費，我都會罷」，就好有當年毛主席大手一揮，號召全國大學生跟佢嘅大氣魄。不過咁，嗰陣時全國大學生跟住老毛，將矛頭直指劉少奇，老毛叫佢哋憎老劉，清華大學就拉埋劉少奇個老婆王光美嚟鬥，中文大學出版社有一本國內學者所寫嘅論著《一葉知秋──清華大學一九六八年百日大武鬥》，就係講毛主席點樣感化到大學生去鬥爭。
「亞瑟王」嘅號召力，比起老毛，就弱咗少少，何況𠵱家啲大學生係對李唐兩個人，都一齊咁唔妥。李國章點樣將大學生爭取過嚟自己呢一邊，再分化八個大學校長同政府，令到自己成為大學生嘅精神領袖，咁就認真考功夫。不過，若果做到呢一樣，二○○七年普選特首（連民建聯曾鈺成都轉軚話支持咯，可見二○○七年嘅第三屆特首由直選產生，已經唔再係一件遙遠嘅天方夜譚），佢李國章如果出山直選，重會贏硬㖭。
不過點都好，喺呢場大學生危機之中，李國章嘅表現，剛勇得有啲鬼鬼哋，始終係最有政治家風範嘅一個，佢能笑會哭，能言善辯，玩到班大學生陀陀擰。梗係喇，李國章官仔骨骨，家族大把錢，四五代都係正宗香港人，第三屆特首，佢撈唔撈都好閒，呢句相信係真心說話。
做人無謂咁冇尊嚴。肥彭臨走引述傑克倫敦嘅詩：「寧化飛灰，勿作揚塵」，睇嚟影響力都好深遠。
傳真︰2623-9278
電郵︰