揸車戥親，行路跌親，除咗怪公路、行人路建造得唔好之外，惟有怪一句：「運氣不佳」。冇運氣、有運氣，其實係「隨緣」，有緣千里能相會，無緣咫尺不相逢。某年在台灣桃園機場入境排隊之時，排在左丁山前面嘅，竟然係一位中學畢業後就移民加拿大，多年不見不通音信嘅同學，大家相顧失笑，見面亦是緣份。
此晚賓架集會，主催賓架伍請咗一位來自加拿大嘅法師講人生隨緣，不可強求嘅道理。賓架乃世俗之人，成日俾人鬧銅臭兼市儈，大家食飯之前，聽吓法師講道理，可以清淨腦筋。此法師不比一般和尚，大概居住加拿大久矣，知道演講前先講笑話嘅西方習慣。佢話：「我並非自小出家，讀書時一位同學嘅父親係大賓架，佢周時聽老父講如何才是一個成功的銀行家，據佢嘅爸爸所講，銀行家係一個你要錢，佢唔肯畀錢；你唔要錢，佢就猛『挨』你要錢嘅人。點樣先算係一個成功銀行家呢？就係一生從事銀行貸款業務，過身後冇人會到靈堂送殯之人！」
成班賓架你望我，我望你，拍掌大笑，法師幽銀行家一默，唔通冇接受嘅雅量咩！三藩市美國銀行舊總部，高聳入雲，位於加利福利亞街，大門前有一個巨型雕塑，全部黑色，雕塑就係一夥心，心係黑色嘅。銀行門前擺放一個巨型黑色的心，意思當然好明白。法師悟透人生道理，知道因果循環，佢講嘅道理，不能一一盡錄，但教我哋一個減壓方法，明天再談。