香港嘅公共諮詢組織，多過投注站，一個人兼十幾份公司職，開會遲到早退，烏眉瞌睡，閒過立秋。外號公職王的李業廣，近日又接多一份公職──香港藝術節協會主席。八方噚日在北京遇見查理士．李，問佢點解肯孭多一份義工，原來係同剛剛唔撈強積金管理局行政總裁嘅政府「橋王」許仕仁有關。
查理士話知道許老爺肯接手做藝術節節目委員會主席，先至肯擔任藝術節主席一職，因藝術節要成功，最緊要係有好節目。許仕仁本身熱愛文藝，經常周遊列國，睇過唔少藝術表演，由佢揀選來港表演嘅藝術團體，肯定事半功倍，所以佢先肯孭起負責籌款及行政等工作嘅主席一職。講起籌錢，佢話今次藝術節經費要五千八百萬元，政府資助一千七百萬元，門票收入則料有二千四、五百萬，尚須一千六百至一千七百萬要靠贊助，條數好睇過「維港匯」多多聲，上任不到數日嘅查理士便話，有關贊助費已經搞掂。
不過，當傳媒問起佢近期與靚女同枱食飯嘅報道時，佢就即刻話「呢啲係私人事喎!」，跟住先答「適當時候自有交代」，大家惟有轉話題。
傳真︰2623-9278
電郵︰