林麥集團（915）呢隻經紀黃前度愛股，自從大股東減持後，交投明顯轉靜，但近排股價默默上揚，上周五一度重上52周高位3.45元。經紀黃話，唔排除有人想趁高位進行批股活動。
林麥上周五升2.26%，收3.40元，但成交股數只有60萬股咁大把，成交金額204.9萬元。以往分析員在推介林麥之時，都喜歡將佢同利豐（494）比較，但就話林麥便宜得多，其實林麥現價往續PE亦高達23倍。
林麥上周公布，以1.55億元收購做家居娛樂及消費電子產品的供應鏈管理公司，收購基本上以現金支付。
雖然林麥手頭現金充足，早前重話有接近4000萬美元咁多，但一單收購就用咗接近一半現金，家陣股價咁靚仔，如果有人肯接貨，確係好難拒絕。
另外，味丹國際（2317）亦在批股傳聞之列，近期股價勁升，公司又正在搞團去越南睇味精廠，有晒手影。但經紀黃話，批股活動應該唔會咁快進行，皆因味丹上市未夠半年，要到下個月先至夠期。
慕容小初