近日政府放風要大削大學撥款，八間大學同氣連枝，齊聲反對。大使唔係生神仙，唔知事件會演變成點，只知受害者最終都係一班苦學生。
講起苦學生，大使都接觸唔少，早排大使先後接過兩個大專生嘅求助個案，有位男生嘅爸爸早年因病過身、媽媽近年中風同有精神病；另一位女生就爸爸退咗休，一家幾口要攞綜援過日子。兩位苦學生都分別因為升讀大學而冇資格攞綜援金，而要轉去申請Grant&Loan，男生重等緊結果，女生就唔想先使未來錢，所以只係申請Grant部份去交學費，不過生活費就一個仙都冇，屋企人又冇辦法喺有限嘅綜援「餅仔」度分啲畀佢返學搭車同食飯。蘋果基金見呢兩位學生排除萬難，發憤讀書，分別撥咗幾千蚊畀佢哋應急。
我哋基金其實喺教育方面都幫唔少，除咗「蘋果助學金」幫啲家貧嘅中小學生之外，好似呢兩個兩頭唔到岸嘅Cases，申請到呢樣就申請唔到嗰樣，正處喺夾縫之間又唔可以即刻有應急錢打救到佢哋，我哋基金正好救急扶危。各位非政府機構、學校老師同社工，如果遇到呢啲苦學生近日冇厘心機，有經濟問題解決唔嚟，坊間又冇資源幫到佢，不妨打個電話嚟傾傾，我哋基金幹事核實之後，定會盡辦法幫幫忙。
暖流熱線
電話：29908688
傳真：23702192
電郵：
網址：