蘇格蘭前晚喺歐洲國家盃外圍賽附加賽贏咗荷蘭，入球功臣麥法頓即成英雄。不過呢個二十歲小伙子，並冇因自己日漸成名而目中無人，反而好夠義氣，叫其他球會留意吓同佢一齊喺蘇超聯馬瑟韋爾出身嘅前隊友！
其實麥法頓喺呢役之前，已開始喺愛華頓爭得上陣機會，且備受注目。呢個新星日前接受報章訪問，就只係一輪嘴咁同記者講佢喺馬瑟韋爾嘅前隊友，又話呢個勁又話嗰個醒，講到各大歐洲球會唔喺當中搵番一、兩個就走寶咁，真係有義氣得嚟又夠可愛！佢喺賽後亦好識做，話功勞唔止自己一個，係全隊努力，完全冇一朝得志就語無倫次，抵讚！
保頓上周六主場同聖保羅打友賽，結果輸三比六，據助教費爾布朗講，希望同聖保羅成為「盟友」，之後就可搵啲年輕球員。我求大俠懷疑，搵南美兵過英倫，申請工作證難過登天；而且聖保羅好球員都留畀大球會，好似曼聯想斟個法比安奴，開價都千一萬鎊，保頓點爭呀？
上星期六嘅足球賽事幾乎全部吹冷風，反而冇開盤嘅捷克友賽加拿大，戰果就正路得多，主隊捷克輕鬆以五比一大勝，最開心嘅相信係中場嘅老將普波斯基喇；因為佢平紀錄嘅第九十次代表捷克上陣，球隊順利贏波之餘，自己重入番球，替球隊射成三比○㖭！
成日話運動同政治唔好扯上關係，但係博彩就唔同；前排意大利友賽波蘭前夕，伊拉克有意大利軍人被炸死，結果意隊輸波。土耳其前晚香俾拉脫維亞，咁啱伊斯坦布爾又炸死人。其實啲同胞死得咁寃枉，球員點都會受影響，所以記住以後落鎚前，要睇睇國際新聞先。
葡萄牙前晚友賽又只能夠打和客軍希臘，費高又射失十二碼，搞到葡國贏唔到波。記憶中佢都唔止呢趟，皇馬亦多得佢唔少。我求大俠睇住佢喺巴塞嚟料，喺皇馬威風，𠵱家見佢耷緊。前排更有調查話佢喺皇馬六條煙裏面，最唔值得攞歐洲足球先生個獎，可見佢人氣大跌。