PoloRalphLauren、GianniVersace、HugoBoss、Santoni、ErmenegildoZegna，以上牌子你熟口熟面，但打開衣櫃就一件都無，梗係喇，件件都唔平，唔係人人豪得起。不過世事無絕對，今日就有公司同DicksonWarehouse搞特賣場，一次過將10多個歐洲名牌1折起出售，以前一件衫嘅價錢，今日隨時買幾件，斷估𠵱家買得起嘞啩？
記者：黃婉冰 攝影：蔡鴻雯
模特兒：Kinki、Kwokzu（SunSpot）
Polo老少咸宜，款式10歲到80歲都啱着，好似副線PoloSport就最適合後生一族，簡單一條Onepiece裙，顏色夠Sharp，款式夠Young，着咗好有少女味；男裝長興V領Tee，當打波裝束，掂，當普通出街Look，亦得，襯埋條HugoBoss長褲，即變身周末Casuallook。
onKwokzu：PoloV領長袖Tee 原價$890 開倉價$89
HugoBoss長褲 原價$1,800 開倉價$650
onKinki：PoloV領Onepiece裙 原價$1,400 開倉價$140
恤衫一年四季都啱着啱襯，門市賣緊嘅款式，一樣照減，條紋、彩馬Oxford、格仔，返工着得平時着亦得，最平$100唔使有1件，趁平執多幾件，可以日日玩唔同款。
除恤衫外，PoloTee係另一必掃搶手貨，最Classic嘅領口扣鈕款當然要掃，其他質地較薄嘅棉質反領ZipUp款同圓領Tee一樣咁抵，款式較簡單傳統，買多幾件留番下季着都唔怕過時。
啱送畀老竇
GianniVersace極少減價，千載難逢當然唔可以錯過，今次Casualwear比較多，好似呢件有少少Seethrough嘅短袖恤衫，減到半價都唔使，而且款式比較大路，穩陣易襯。
唔好以為件件Versace減極都要過千，其實1,000蚊樓下都可以執到筍貨，多款長褲、薄尼龍質料Tee恤，Cutting簡約易襯，雖然款式比較成熟，但買定送畀爹哋做聖誕禮物都唔錯。
男裝褸斯文易襯
男士服裝又點少得HugoBoss？要Casual又斯文，可以揀呢件條紋西裝褸，款式唔太Formal，基本上襯牛仔褲或西褲已經好型，薄薄哋𠵱家秋涼天氣最啱着。
HugoBoss間條西裝褸
原價$5,500 開倉價$2,000
ErmenegildoZegna圓領Tee
原價$1,400 開倉價$590
Polo黑西褲
原價$460 開倉價$230
法國牌子Toupy，唔少時裝店都有賣呢個brand嘅時裝，走型格獨特路線，大褸款式加入牛仔布呢個摩登元素，披口反袖設計夠晒型格，幾百蚊有件大褸夠晒化算。
墨綠碎花Onepiece裙
另一個法國牌子con‧copine，一樣走Youngline，裙身用軟薄綿質布料，以碎花布襯上兩層式花邊裙腳，有層次感得來不覺累贅，Onepiece重可以慳埋襯衫時間。
今次大減價，衫褲係主打，同場另有女裝手袋、男士皮帶同頸巾，頸巾款式男女俱備，質地有絨布、線冷同毛冷，同Pattern一樣有多種選擇。
意大利名牌Santoni出名手工精細，全部選用牛皮同植物染料，一向只限連卡佛同西武有售，而今次大減價連Santoni都照減，尺碼齊全，另外又有百多款唔同牌子男裝皮鞋，但全屬貨辦，所以只得一對，女士們亦可趁機揀番對高踭鞋。
原價$1200 開倉價$350
原價$2,400 開倉價$1,100
原價$2,600 開倉價$1,000
原價$2,300 開倉價$1,000
歐洲名牌服飾皮具減價日
地點：香港黃竹坑道62號科達設計中心23樓（油站左面第2座大廈）
日期：即日起至11月23日 時間：12:00nn至8:00pm
查詢電話：25768776
付款方法：現金及Visa、Master（消費滿$500或以上方可使用信用卡）
交通：可於中環交易廣場巴士總站乘70、90號巴士或於銅鑼灣三越門口乘42、72、96、592號巴士，經過香港仔隧道後於球場落車，向前行若2分鐘到達。
