參加東望洋大賽的澳門車手李松勝手車辣唔辣就唔敢講，不過就肯定係個二十四孝老竇，因為李松勝嘅仔仔喜歡鹹蛋超人，佢就將成架車噴上超人公仔，咁突出嘅造型，難怪車迷爭相同架車合照。
今年大賽車新增多個示範項目，噚日登場的就係由格蘭披治電單車賽冠軍路達，載住中獎幸運兒喺東望洋片番幾轉，其中一位來自香港的彭小姐就全程攬住路達實一實，不過又好難怪，二百幾公里的時速並唔係人人頂得住。
小記前晚搭的士，同司機大佬傾開賽車，原來佢前幾日載過東望洋大賽冠軍許士文，夜晚喺賽道走番兩轉，司機重話，許士文好謹慎咁睇住每個彎位。許士文已經喺澳門比賽幾年，都咁認真備戰，抵佢喺東望洋大賽三連冠。