早前去咗哈佛短期進修嘅滙豐銀行老總柯清輝，已經學成回港，回想哈佛生活，佢話「冇讀書咁耐，讀番梗係辛苦」，不過喺波士頓嘅短暫日子，亦有難忘經歷，就係認識咗一班來自世界各地的「同學仔」，部份更成為傾得埋的老友。
「班內乜人都有，有軍佬、製造商、高科技人、財經界及廣播界人才……」學員共一百六十三人，香港人得四個，土生土長嘅香港人連埋佢只得兩人，也有來自新加坡的渣打銀行行家。滙豐是全球市值第二大銀行，柯老總說，同學中當然不乏滙豐嘅客仔。
雖然課程唔使考試，但柯清輝說，壓力來自評核及每日進行的livinggroup討論，一到晚上，八九個組員就要圍埋一齊，預備翌日的個案及演說，如果偷懶唔預備，或者英文水少少，第二日就會擘大口得個窿，咪話冇壓力！儘管離開香港僅兩個多月，「都好掛住呢度」。所以我哋煲呔曾，喺哈佛鍍過一層金，真係有料到㗎。
傳真︰2623-9278
電郵︰