電腦新產品：<br>超薄輕巧媲美Book華碩Windows版白之戀人

電腦新產品：
超薄輕巧媲美Book華碩Windows版白之戀人

上網查一查，原來白色代表完美、自信同驕傲，而喺電腦界又代表啲乜？兩個字，靚爆呀！自己心裏數數，腦界至有品味嘅Mac機、ibook、iPod通通鍾意用白色，而華碩即將喺12月「變出」一部珍珠白筆記簿電腦S5N，淨係睇外表已經非常煞食，夠晒輕身，包保拎過上手都流晒口水，正！

記者：許福合　攝影：林栢鈞　ImageGirl：小惠

蘋果電腦近年有唔錯成績，最重要嘅原因就係夠創意，放棄一般筆記簿電腦嘅黑色機身，推出白色嘅iBook，魔力驚人，就連完全唔曉用Mac機嘅朋友都話心郁郁想買番部。無論你係PC忠實支持者定係夠理智未受引誘，見到呢部S5N都幾難把持得住，既有iBook嘅美感，內裏仍係熟悉嘅視窗介面，大有成為PC版iBook嘅潛力。

Profile
處理器：Centrino1GHz
記憶體：256MBDDR333
顯示屏：12.1吋（1,024×768）
顯示卡：Intel855GMEGFX
硬碟：20GB
操作系統：中?英WinXP
體積：275×233×17mm
重量：1.26kg

抵讚：拎上手夠輕巧，電量又充足，出街用完全唔使擔心。
要彈：未有彈起上蓋嘅設計，要單手揭起非常困難，每次都要雙手齊齊出動。

漢科電腦
查詢電話：27930368

蘋果電腦近年有唔錯成績，最重要嘅原因就係夠創意，放棄一般筆記簿電腦嘅黑色機身，推出白色嘅iBook，魅力驚人，就連完全唔曉用Mac機嘅朋友都話心郁郁想買番部。無論你係PC忠實支持者定係夠理智未受引誘，見到呢部S5N都幾難把持得住，既有iBook嘅美感，內裏仍係熟悉嘅視窗介面，大有成為PC版iBook嘅潛力。

珍珠白又靚又輕巧
近期對筆記簿電腦有興趣嘅人，多數喺屋企有部Desktop，想多添一部筆記簿電腦外出工作使用，佢哋買機要求亦都唔同，首要外表靚、機細兼輕巧，S5N呢方面必定入圍，採用嘅珍珠白機身，透明鍵盤，配上新設計防塵Touchpad，已經將其他黑漆漆對手比下去，加上選用大小適中嘅12.1"靚芒，令到機身只有A4Sizes，而且夠晒輕，只重1.26kg，拎住周圍走都好輕鬆，完合符合筆記簿電腦嘅基本要求，擁有極佳流動性。

■纖薄輕巧外形，女士攞出街都咁啱。



外置配件夠齊全
All-In-One筆記簿電腦乜都內置晒，放喺屋企就實用，拎出街就係負擔，完全扼殺咗筆記簿電腦最重要嘅流動性。小記特別欣賞S5N放棄內置光碟機，改為提供更常用嘅SD、MMC及MS三合一讀卡器，同時亦有唔錯擴充性，用家分別可使用3個USB2.0及1個IEEE1394插頭去接駁外置裝置，隨機更包括USB介面嘅ComboDrive，毋須外置火牛，有需要先裝上使用，夠彈性！另外重會送多支64MBFlashDrive，用嚟抄送檔案特別好用。

■新設計嘅密封Touchpad，唔怕入塵，亦提高咗靈敏度。

■透明鍵盤配上珍珠白機身，相當合襯。

■跟機外置式ComboDrive似足CD盒，而且毋須使用火牛，靠USB取電。

■有齊USB2.0同IEEE1394，方便接駁外置裝置使用。



用足10個鐘極慳電
輕細都重未夠，筆記簿電腦最怕大食，用唔夠1個鐘冇電熄機就最冇癮，S5N當然有考慮用電量，所以選用Centrino規格，使用IntelULVP-M1GHz處理器，顯示用內置GFX，支援802.11b無線網絡，加上使用耗電更少嘅1.8吋20GB硬碟，能以最慳電方式提供最強功能。不過淨係慳都未夠，開源同樣重要，S5N會配備標準同特大電池各一，標準電可用5個鐘，特大號電就更勁，足足可用到10個鐘！而且電池唔算重，帶晒出街就可保證電源不絕。

■送多條FlashDrive，有64MB容量，抄檔案夠方便。

■內置SD、MMC及MS讀卡器，影完相可以即刻睇番。

■開機後開關掣會長着藍燈，好搶眼。

■提供Power4Gear，可預設電源模式。