第50屆澳門格蘭披治大賽車，終在昨日圓滿結束，多場既精采又緊張嘅賽事，無不令人拍案叫絕，而場內場外嘅氣氛亦比往年來得熱鬧；其中最惹人注目嘅東望洋房車賽，寶馬車隊再度衞冕成功，而比賽時更有唔少驚險鏡頭㖭！另外，三級方程式車賽及PorscheCarrera亞洲盃亦係今屆賽事嘅焦點所在。不如就趁今日，一齊嚟重溫一下當日嘅盛況啦！
記者：鄭達基 攝影：陳偉強 部份圖片由大會提供
本港著名車手陸淦駕駛嘅本田IntegraDC5，響開賽後無耐因閃避車輛而遇上意外，並牽涉多部賽車；而寶馬車隊嘅梅拿（JorgMuller）於第一回合時，響過彎嗰陣攔腰猛撞夏里遜（SimonHarrison）駕駛嘅本田IntegraTypeR，隨後雙雙被迫退出比賽，而梅拿亦因為咁而被大會判定不適當駕駛而撞及其他戰車，並罰款$3,000美元。然而，改以愛快147作戰車嘅澳門車手古圖（AndreCouto），雖然能夠以排頭位資格出戰，但一起步時就被許士文（DuncanHuisman）率領嘅寶馬戰車圍攻，再加上由夏里遜駕駛嘅本田IntegraTypeR步步進逼，而一度跌落較後位置；隨後經過奮力作戰，再度進佔較高名次，不過後來因緊隨梅拿與夏里遜時，被佢哋發生意外後，由車上彈出嚟嘅碎片割破水箱令引擎過熱，而被迫退出比賽。
至於第二回合，由於參賽車輛數目較上回合少，故此擁有多年經驗嘅許士文可從容不迫地作賽，並能順利再度登上東望洋大賽總冠軍嘅寶座；而亞軍及季軍嘅位置，則由同樣駕駛寶馬320i嘅顏士拿（FranzEngstler）及亨尼力斯（MarcHennerici）奪得。
至於同樣廣受車迷注目嘅PorscheCarrera亞洲盃，亦見激戰連場；原本駕駛20號車嘅馬依思（MatthewMarsh）係排頭位出賽，但響本港著名車手關兆昌及美國車手熊龍（AlexanderYoong）圍攻之下，最終只獲一席季軍，熊龍及關兆昌則分別奪得冠軍及亞軍寶座。至於三級方程式車賽戰況亦見激烈，首回合比賽中，原本排第3位出賽嘅郭尼（JamesCourtney），因多位勁敵嘅戰車發生事故或意外，再加上出色嘅技術，順利獲得首回合嘅冠軍寶座；而響第二回合，拿派爾（NicolasLapierre）表現出色，不但勝出第二回合，而且重榮登總冠軍寶座㖭！
唔知係咪同今年澳門格蘭披治大賽車50周年有關呢？不但參賽車輛同埋入場觀戰嘅車迷比往年多之外，就連賽車女郎亦比往年多，因而吸引咗唔少車迷爭相同佢哋合照留念，場面十分熱鬧。
大會方面為慶祝澳門格蘭披治大賽車踏入第50屆嘅大日子，故響各場精采嘅比賽後，安排咗多個特別項目，當中包括老爺車巡遊、雙座位電單車及雙座位雷諾方程式2000接載乘客（見圖），巡遊東望洋跑道等等；若論最吸引嘅，相信會係佐敦車隊嘅F1戰車及寶馬M3GTR，響東望洋賽道上嘅極速表演，全都令在場車迷感到高興之餘，亦大讚今屆賽車嘅節目，比往年好睇得多呢！
無論響場外抑或喺場內，今年都設有唔少售賣紀念品嘅攤位，一眾車迷皆可在此揀選自己嘅心頭好；而著名輪胎製造商Yokohama，亦於場內設有攤位售賣佢哋嘅紀念品之餘，旁邊重展出咗多款輪胎，從而令車迷對佢哋嘅產品有更深認識呢！
