譚詠麟、張學友、許志安同陳慧琳（Kelly）前晚去咗大馬雲頂出席「第三屆金曲紅人頒獎禮」，全晚得獎歌手以環球集團嘅歌手為主，直情可以叫做「環球音樂頒獎禮」，不過陶喆同周杰倫人唔到，都攞到唔少獎。
阿倫攞個「流行樂壇榮譽大獎」，克勤同Kelly分別得「最受歡迎紅人男女歌手獎」，「最佳演繹男女歌手」就係安仔同Kelly，學友攞得最多獎，有四個，包括「亞洲傑出歌手表現獎」同「最喜愛中文演唱會歌手獎」等，Kelly就攞咗三個半，成為女歌手大贏家。
頒獎禮都不外乎話邊個歌手攞幾多個獎，邊個食白果，冇啲驚喜，歌手坐喺台下有時都幾悶，不過前晚就有位來賓搞到成班歌手醒神晒。話說成班歌手坐喺台下頭兩排座位，頒獎禮進行咗一半，突然阿倫好似發現新大陸咁，同身旁嘅Kelly講：「你睇吓，有老鼠呀。」
只見一隻老鼠喺歌手座位席下跑來跑去，成世人最怕老鼠曱甴嘅Kelly即刻忍唔住尖叫兼起身走人，然後其他歌手二話不說就四散，幾個工作人員出嚟清理現場後，大家先敢返埋原先座位坐，情景都幾好笑，而咁多歌手之中，表現最鎮定嘅係阿倫，佢重施施然睇住人捉老鼠，最驚嘅係Kelly，佢怕到上台唱完歌即走，唔想留喺個場館度呀。
陳欣健嘅母親陳劉渭娟，日前因為癌病逝世，享年八十歲。陳欣健噚日喺世界殯儀館為媽咪設靈，並會採用天主教儀式舉殯，遺體出殯後會送去歌連臣角火化。問到陳欣健佢媽咪走嘅時候有冇乜嘢遺言，佢話：「媽咪好堅強，佢深信會好番，但都冇諗到會惡化，咁快就走，所以都冇遺言。」
郭晉安噚日去咗喇沙書院出席活動，現場重有超過五百個唐氏綜合症小朋友同屋企人，佢哋見到安仔都好開心。因為阿旺嘅角色同啲小朋友都好接近，所以對安仔好熱情。而安仔就話：「我平時都會捐錢去『生果日報』嘅基金畀有需要嘅人實現希望。」唔知係咪做得善事多，真係對運程有幫助呢！
張可頤最近被踢爆同陳容森（阿Sam）為事業假分手，日前重被拍到陳容森去佢嘅香閨過夜嘅相。張可頤前晚回應：「實際上我身邊都好多朋友，我屋企嘅房間好多，有時助手都會嚟過夜。我同阿Sam唔會再係情侶。」馮仁昭都係嗰句，覺得好多時藝人解釋就係掩飾，張可頤呢單case唔知係咪一個好嘅例證呢？
梁詠琪（GiGi）噚日喺理工大學出席港台活動，校園度遍布影畢業相嘅畢業生，令GiGi勾起當年自己影畢業相嘅情形，佢話當年只係用儍瓜機，唔似𠵱家啲學生有晒專業攝影師打埋燈咁好，對於大學生打算罷課抗議政府削減教育經費，GiGi話對大學生係一個好嘅經驗，因為佢當年冇乜機會參與呢類學生活動。其實又有邊個想要有啲咁嘅經驗呀！
