區議會選舉拉票活動進入最後階段，候選人呢排都紛紛邀請政界猛人幫手拉票，以壯聲威，據八方觀察，中產出身，𠵱家就同草根市民打成一片嘅兩位大狀余若薇同吳靄儀，最受候選人歡迎，好多時都見到兩位大姐好努力咁幫班民主派候選人派傳單、嗌咪。
噚日公民起動兩位灣仔候選人搞拉票活動，自然唔少得佢兩個。其中余若薇話，最近為咗出席呢類活動，每日都要早起夜瞓，噚日感冒、頭痛、喉嚨痛，都要一日走三場，朝早去中西區，下晝又去灣仔同大埔，佢咁搏命，目的唔係為咗纖體減肥，而係想呼籲大家喺下星期日出嚟投票，制止政治投機分子上位，各位余若薇擁躉，唔好唔記得7.1大遊行，識做啦。
（圖）余若薇（左二）雖然喉嚨痛，噚日都瞓身為公民起動兩位灣仔候選人嗌咪拉票。
李家皓攝
李家皓攝
傳真︰2623-9278
電郵︰