米倉涼子同緋聞男友池珍熙拍完電視劇《Sonagi停雨的下午》後，就好鬼鍾意韓國。
米倉早排去咗漢城接受任命做日韓親善大使時，見過南韓總統盧武鉉呢啲公式活動就報道過唔少，原來佢私底下喺短短三日內，四圍飲飲食食兼shopping，總之要試盡當地最出名嘅嘢，講穿佢就係公務為副、去威為實！
米倉一落機，已經有二十幾個記者包圍佢，重讚佢真人好靚，唔怪之得米倉成日讚韓國人親切。
見完盧武鉉後，俾shopping蟲咬身嘅米倉已經急不及待叫個韓國朋友陪佢行街。
我羅拉見佢第一時間就買韓國出產嘅紗布、又買傳統服裝公仔做手信，似乎幾有日本啲親友心，但轉頭佢即成個大唔透咁狂掃街頭小食，又去搵當地好出名嘅設計師李英姬幫佢度身訂做衫，最後買咗十幾套，真係不脫佢愛衫如命嘅本色。米倉重着住王妃服拍照留念，鬼咁得戚。
不過米倉話佢最開心嘅，係佢可以親身做佢最鍾意嘅泡菜，見佢雞手鴨腳，似乎平時冇乜下廚，所以佢最後都係乖乖地坐低烤燒肉食泡菜。