信和嘅將軍澳蔚藍灣畔，喺旗下大角嘴奧海城商場設置示範單位，過去兩日吸引超過十萬人參觀，令平日人流一般嘅商場變得好熱鬧。睇樓人士至少要等四十五分鐘先入到場，重要輪流參觀總共五個示範單位，成個過程大約需時兩個鐘，唔少人一家大細，扶老攜幼睇完樓之後，都會好攰想坐低飲杯嘢，商場入面五花八門嘅食肆自然成為搵食對象，聽講商場大部份餐廳近兩個禮拜生意額飆升。
發展商都好識做，為免啲客等到悶走人，安排娛樂節目，有踩住高蹺巡迴表演嘅小丑，每次路過或者停低表演，都會吸引大班人圍觀起哄，尤其有禮物收嘅小朋友，就更加唔捨得走。
另外，又有靚女喺模擬露台上面，不停咁示範瑜伽，動作優美，大人細路都睇得好開心，排緊隊都唔覺悶，部份更加睇完樓都唔願走，呢招留住班客都幾有效。
鷹君集團同市建局合作嘅旺角市區重建項目朗豪坊，搞咗超過十年至落成，發展商梗係好重視啦！除諗好多宣傳攻勢招攬租客，就算今個禮拜四搞平頂禮都花盡心思。
蘭西啱啱收到佢哋送嚟嘅請柬，係掛支汽酒上，認真特別，話畀人知呢個係值得飲酒慶祝嘅日子。酒樽重貼上朗豪坊平頂禮同埋日期嘅貼紙，咁一定唔會唔記得啦！
朗豪坊總樓面面積一百八十萬方呎，包括一幢有六百八十六個房間嘅五星級酒店、一幢五十九層高甲級寫字樓，同埋一個樓面達六十萬方呎嘅商場，料會成為旺角區嘅新地標。
華置大股東劉鑾雄，似乎對旗下有份發展嘅東半山肇輝臺8號特別緊張，自從樓盤上個禮拜低調開售，到𠵱家唔夠十日，已經先後四、五次親到場視察銷情。
聽班代理講，大劉每次都會喺六點零七點左右到達，大約逗留半個鐘就離開。
肇輝臺8號係華置近半年開售第三個樓盤，之前兩個喺上環同土瓜灣嘅新盤，都從未見過大劉現身，反而今次就頻頻出現，相信除咗個盤夠豪之外，又係華置首個合作發展嘅住宅項目，點都唔似獨資咁輕鬆。
豪宅買賣氣氛熾熱，估唔到連二十一年嘅一手貨尾都有買家吼，中原地產富豪花園分行經理侯惠良講，沙田富豪花園嘉美閣一個高層二千五百方呎A同C室相連單位，啱啱以四百八十八萬賣咗，呎價一千九百五十二蚊，重係今年新高價㖭，個價咁理想除係頂層對落一層，重因為屋苑好少相連戶放售。
佢話發展商華懋集團原本堅持要五百萬至肯賣，傾咗一個禮拜至肯降價成交。買家係同屋苑業主，對單位嘅情況應該好了解。
蘭西
電郵地址：